پورتو الگیرہ۔ 23؍جون (سیاست ڈاٹ کام)۔ ورلڈ کپ 2014ء کے گروپ ایچ کے ایک مقابلہ میں بلجیم نے روس کو شکست دے کر ناک آؤٹ مرحلہ کے لئے کوالیفائی کرلیا ہے۔ بلجیم نے ابھی تک دو میچ کھیلے ہیں اور دونوں میں کامیابی حاصل کی ہے۔ اگر بلجیم اپنے گروپ میں سرفہرست مقام حاصل کرلیتی ہے تو وہ گروپ جی کی دوسرے نمبر پر آنے والی ٹیم کے ساتھ اپنا ناک آؤٹ مرحلہ کا مقابلہ کھیلے گی۔ گروپ جی میں جرمنی، پرتگال، امریکہ اور گھانا کی ٹیمیں شامل ہیں۔ میچ کا پہلا ہاف بغیر کسی گول کے برابر تھا۔ پہلے ہاف میں بلجیم نے اس کھیل کا مظاہرہ نہیں کیا جس کی اس سے توقع کی جارہی تھی۔ بلجیم کے فارورڈ رومیلو لوکاکو ایک مرتبہ عمدہ کھیل پیش کرنے میں ناکام رہے اور کوچ نے پہلے میچ کی طرح لوکاکو کو میدان سے واپس بلاکر 19 سالہ اوریگی کو میدان میں بھیجا جنھوں نے کھیل کے آخری لمحات میں گول کرکے ٹیم کو فتح دلادی۔ فٹبال کے ماہرین کو 21 سالہ رومیلو لوکاکو سے بہت توقعات تھیں، لیکن ابھی تک وہ ان توقعات پر پورا اُترنے میں کامیاب نہیں ہوئے ہیں۔ فٹبال ماہر ڈینی ملز کا کہنا تھا کہ رومیلو لوکاکو کبھی کبھی کہیں کھوئے ہوئے لگتے ہیں، میں یقین سے نہیں کہہ سکتا کہ آیا وہ بلجیم کے اٹیک کی قیادت کے لئے صحیح انتخاب ہیں۔ وہ شاید اس ٹیم کی واحد کمزوری ہیں۔ میچ کے دوسرے ہاف میں بلجیم نے ٹیم میں کئی تبدیلیاں کیں، لیکن کھیل کی رفتار میں کوئی تبدیلی نظر نہیں آئی۔ جب صرف دس منٹ کا کھیل باقی تھا تو بلجیم کی ٹیم نے روسی گول پر تابڑ توڑ حملے شروع کردیئے۔ روسی کھلاڑیوں کے لئے بلجیم کے مڈفیلڈر ایڈن ہیزارڈ کو روکنا مشکل ہوگیا اور میچ ختم ہونے سے صرف پانچ منٹ پہلے ایڈن ہیزارڈ ہی کے ایک شاندار پاس پر 19 سالہ اوریگی نیگول کرکے اپنی ٹیم کی فتح کو یقینی بنادیا۔ بلجیم کو اپنا اگلا میچ 26 جون کو جنوبی کوریا سے کھیلنا ہے۔
