جوہانسبرگ۔4 جون(سیاست ڈاٹ کام)نوجوان جنوبی افریقی فاسٹ بولر کگیسو ربادا نے کرکٹ جنوبی افریقہ کا سالانہ ایوارڈز کا میلہ لوٹ لیا اور کرکٹر آف دی ایئر ایوارڈز سمیت مجموعی طور پر چھ ایوارڈز اپنے نام کئے۔سی ایس اے سالانہ ایوارڈز کی تقریب سینڈٹن میں منعقد ہوئی جس میں ایک سال کے دوران تینوں طرز کی کرکٹ میں نمایاں کارکردگی کا مظاہرہ کرنے والے کھلاڑیوں کو ایوارڈز سے نوازا گیا۔فاسٹ بولر ربادا تقریب میں چھائے رہے اور کرکٹر آف دی ایئر، ٹسٹ کرکٹر آف دی ایئر، ون ڈے کرکٹر آف دی ایئر، پلیئرز پلیئر آف دی ایئر، فینز پلیئر آف دی ایئر اور ڈیلیوری آف دی ایئر ایوارڈز اپنے نام کر کے میلہ لوٹ لیا۔ربادا نے تقریب میں 6 ایوارڈز جیتے اور یہ اعزاز حاصل کرنے والے پہلے جنوبی افریقی کھلاڑی بن گئے ہیں۔حال ہی میں انٹرنیشنل کرکٹ کو خیرباد کہنے والے اسٹار بیٹسمین اے بی ڈی ویلئیرس ٹی20 انٹرنیشنل کرکٹر آف دی ایئر ایوارڈ حاصل کرپائے۔آلویز اوریجنل ایوارڈ ڈیوڈ ملر کے نام رہا جبکہ ایڈن مارک رام نے انٹرنیشنل نیوکمر آف دی ایئر ایوارڈ حاصل کیا۔
