ترواننتا پورم۔2 اپریل (سیاست ڈاٹ کام) کانگریس صدر راہل گاندھی کیرالا کی وائناڈ لوک سبھا سیٹ سے جمعرات کو کاغذات نامزدگی داخل کریں گے ۔ وہ دو سیٹوں سے انتخاب لڑ رہے ہیں۔پارٹی ذرائع نے منگل کو بتایا کہ مسٹر گاندھی بدھ کی شام یہاں پہنچیں گے اور چار اپریل کو وائناڈ سیٹ کے لئے فارم داخل کریں گے ۔کانگریس جنرل سکریٹری اومن چانڈی، کے سی وینو گوپال، مکل واسنک، انڈین مسلم لیگ کے رہنما کنہالی کٹو اور پارٹی کے کیرل ریاستی صدر ایم رامچندرن سمیت کئی سینئر لیڈر مسٹر گاندھی کی نامزدگی کے وقت قاضی کوڈ اور وائناڈ جائیں گے ۔مسٹر گاندھی امیٹھی لوک سبھا سیٹ سے بھی انتخاب لڑ رہے ہیں۔ کانگریس جنرل سکریٹری کے وائناڈ سیٹ سے انتخابی جنگ میں اترنے کا اعلان کا کیرالہ کے وزیر اعلی پنرائی وجین، مارکسی کمیونسٹ پارٹی کے سابق جنرل سکریٹری پرکاش کرات سمیت بائیں بازو پارٹی کے رہنماؤں نے سخت مخالفت کرتے ہوئے کہا ہے کہ اس سے یہ پیغام جاتا ہے کہ کانگریس، بھارتیہ جنتا پارٹی کے نہیں، بلکہ بائیں پارٹی کے خلاف انتخابی میدان میں ہے ۔ اس دوران مسٹر گاندھی کے لئے ‘نرم رویہ ’ اختیار کرنے کی وجہ سے پارٹی کے جنرل سکریٹری سیتا رام یچوری پارٹی کے اندر تنہا نظر آ رہے ہیں۔ مسٹر یچوری کا کہنا ہے کہ بائیں بازوپارٹی کو انتخابات کے وقت کسی طرح کے تنازعہ میں پڑنے کی بجائے یکساں خیالات و نظریات رکھنے والی پارٹیوں سے تال میل کرنا چاہئے اور بی جے پی کو ہرانا ہی فی الحال واحد مقصد ہونا چاہئے ۔قابل ذکر ہے کہ لوک سبھا انتخابات 11 اپریل سے 19 مئی تک سات مراحل میں ھونے جا رہا ہے ۔ووٹوں کی گنتی 23 مئی کو ہوگی۔
