ابوظبی۔24 ڈسمبر (سیاست ڈاٹ کام ) رئیل میڈرڈ فٹبال کلب نے چوتھی مرتبہ کلب ورلڈ کپ فٹ بال ٹورنمنٹ جیت کر نئی تاریخ رقم کر دی۔فیفا کلب ورلڈ کپ متحدہ عرب امارات 2018 میں رئیل میڈرڈ نے فیصلہ کن مقابلے میں ابوظہبی کلب العین کو 4-1 گول سے شکست دے کر مسلسل چوتھی مرتبہ خطاب اعزاز حاصل کیا۔ کلب ورلڈ کپ ٹورنمنٹ کے فائنل میں رئیل میڈرڈ کے لوکاموڈرک نے14 ویں منٹ میں پہلا گول کر کے ٹیم کو برتری دلوائی۔ پہلے ہاف کے اختتام کے قریب راموس لورینٹے نے دوسرا گول کرکے برتری مستحکم کر دی۔ 79 ویں منٹ میں العین کلب کی طرف سے سیوتانی نے گول اسکور کرکے مخالف ٹیم کی برتری کم کی تاہم تھوڑی دیر بعد رئیل میڈرڈنے مزید 2گول کردیئے۔ رئیل میڈرڈ کلب نے 4 مرتبہ خطاب جیت کر نیا عالمی ریکارڈ بھی قائم کر دیا۔ دریں اثناء ہسپانوی لالیگا فٹبال لیگ میں بارسلونا نے سیلٹاویگو کو0-2 گول سے شکست دی۔لالیگافٹبال لیگ کے سلسلے میں کھیلے گئے میچ میں لیونل میسی کی ٹیم بارسلونا نے شاندار کھیل پیش کرتے ہوئے حریف کلب سیلٹا ویگو کو0-2 گول سے کامیابی سمیٹی۔ اس کے ساتھ ہی بارسلونا کو نشانات کے جدول میں حریف کلب اٹلیٹکومیڈرڈ کے خلاف3 نشانات کی برتری مل گئی۔ لیونل میسی اورڈیمبل نے گول کر کے ٹیم کو فتح دلائی۔
