برلن ، 10 نومبر (سیاست ڈاٹ کام) پاکستانی وزیر اعظم نے کہا ہے کہ ملک میں دہشت گردوں کا ہر ایک ٹھکانہ تباہ کر دیا جائے گا۔ انہوں نے بتایا کہ وہ طالبان اور افغان حکومت کے مابین امن مذاکرات کیلئے تمام ممکنہ مدد فراہم کرنے کیلئے بھی تیار ہیں۔ پاکستانی وزیراعظم نے افغان صدر اشرف غنی کی طرف سے افغان طالبان کے ساتھ مذاکرات کی پیشکش کا خیر مقدم کیا ہے۔ آج جرمن دارالحکومت برلن آمد سے پہلے جرمن اخبار ’دی ویلٹ‘ کو خصوصی انٹرویو میں ان کا کہنا تھا کہ افغانستان کو مستحکم ہونا چاہئے جبکہ افغان صدر اور ان کے اتحادی پارٹنر عبداللہ عبداللہ کا بھی یہی مقصد ہے۔ نواز شریف نے کہا کہ ان کی حکومت طالبان اور افغان حکومت کے مابین مجوزہ امن مذاکرات کیلئے تمام ممکنہ مدد فراہم کرنے کیلئے تیار ہے۔ وزیراعظم کا مزید کہنا تھا، ’’ایک مستحکم افغانستان ہمارے لئے بہت ضروری ہے۔‘‘ افغان صدر نے اپنا عہدہ سنبھالتے وقت افغان طالبان کو امن مذاکرات کی دعوت دی تھی لیکن طالبان کی طرف سے ابھی تک اس دعوت کا کوئی مثبت جواب نہیں دیا گیا ہے۔ پاکستان اور افغانستان میں ’اسلامک اسٹیٹ‘ یا آئی ایس کے خطرے کے پیش نظر نواز شریف کا کہنا تھا کہ جرمنی کو 2014ء کے بعد بھی افغانستان کی مدد کرتے رہنا چاہئے، جس طرح جرمنی پہلے بھی افغانستان کے استحکام کیلئے اور دہشت گردوں کے خلاف بہت کچھ کر چکا ہے۔ انھوں نے کہا، ’’ہم بھی پاکستان میں دہشت گردوں کے خلاف جنگ جاری رکھے ہوئے ہیں۔ ہم نے بھی شمالی وزیرستان میں فوجی آپریشن کے ذریعے انتہا پسندوں کے ٹھکانے اور نٹ ورک کو تباہ کیا ہے۔ یہ ہماری فوج کی بہت بڑی فتح ہے۔ دہشت گردوں کو شکست دینے میں پاکستان کی مسلح افواج کو بہت بڑی کامیابی ملی ہے۔‘‘
