دبئی ۔8 ستمبر (سیاست ڈاٹ کام) ایشیا کپ کرکٹ ٹورنمنٹ کا 14 ویں ایڈیشن 15 ستمبر کو متحدہ عرب امارات میں کھیلا جارہا ہے۔ کئی کھلاڑی اسی ایونٹ میں مظاہروں کے ذریعہ لیجنڈ پلیئرز بنے۔ اس مرتبہ ایشیا کپ میں بھی کئی عظیم کھلاڑی ایکشن میں نظر آئیں گے لیکن ان میں سے 5 بڑے کھلاڑی ممکنہ طور پر اپنا آخری ایشیاکپ کھیلیں گے۔ 1999 میں کرئیر کا آغاز کرنے والے شعیب ملک 156 ونڈے وکٹ اور 7 ہزار کے قریب رنز بناچکے ہیں ،36 سالہ اسپن آل رائونڈر ورلڈ کپ 2019 کے بعد سبکدوشی کا ارادہ رکھتے ہیں۔ ہندوستان، پاکستان اور جنوبی افریقہ کے خلاف اپنی قیادت میں بنگلہ دیش کو سیریز جتوانے والے آل رائونڈر مشرفی مرتضیٰ بھی کیریئر کے اختتام پر ہے۔ خود کو پہلے ہی محدود اوورز کی کرکٹ کے لئے مختص کر چکے ہیں۔34 سالہ مشرفی بھی ورلڈ کپ 2019 کے بعد کرکٹ میدانوں سے رخصتی کے خواہش مند ہیں۔ان کے ہمراہ شکیب الحسن بھی اس فہرست میں شامل ہوتا ایک اور بڑا نام ہے۔ 2004 میں کرئیر کا آغاز کرنے والے ہندوستانی وکٹ کیپر دینش کارتک گزشتہ 2 سال سے اگرچہ مسلسل ٹیم میں کھیل رہے ہیں لیکن ان کا بھی یہ آخری ایشیاکپ ہوسکتا ہے۔ لستھ ملنگا سری لنکائی تاریخ کے کامیاب ترین کرکٹرز میں شمار ہوتے ہیں لیکن فٹنس مسائل کی وجہ سے گزشتہ ایک سال سے ونڈے ٹیم سے باہر ہیں، سلیکٹرز نے انہیں حیران کن طور پر ایشیا کپ اسکواڈ میں شامل کیا ہے ، 35 سالہ کرکٹر کا یقینی طور پر یہ آخری کپ ہوگا۔ ہندوستانی سابق کپتان مہندرسنگھ دھونی کا بھی یہ آخری ایونٹ ہوگا۔37 سالہ دھونی ورلڈ کپ 2019 کے بعد سبکدوش ہوسکتے ہیں۔دھونی کی قیادت میں ہندوستان نے 2011 کا ورلڈ کپ جیتا ہے۔
