لندن۔24 ستمبر(سیاست ڈاٹ کا م) ایشیا کپ میں سابق عالمی اور ایشیائی چمپئن سری لنکائی ٹیم کی انتہائی غیرمعیاری کارکردگی پر سابق کھلاڑی مسلسل سوالات اٹھارہے ہیں۔ ٹیم مسلسل ناکامیوں کے سبب تنقید کا ہدف ہے اور اب سابق کپتان اور بولروں کیلئے دہشت کی علامت بنے رہنے والے اوپنرتلک رتنے دلشان نے ٹیم کو ایک بار پھر اپنی خدمات پیش کردی ہیں۔42 سالہ تلکارتنے دلشان نے کہا ہے کہ میں اب مسلسل مسابقی کرکٹ کھیل رہا ہوں اور کسی بھی وقت بین الاقوامی کرکٹ میں واپسی کیلئے پوری طرح تیار ہوں۔ ایشیا کپ میں سری لنکائی ٹیم ابتدائی مرحلے سے ہی باہر ہوگئی۔دلشان کو دھواں دار بیٹنگ اور خاص طور پر وکٹ کیپر کے سر کے اوپر سے کھیلنے جانے والے ان کے مخصوص اسٹروک ’’دل اسکوپ‘‘ کے باعث پوری دنیا میں جانا جاتا ہے، انہوں نے 2016 میں سبکدوشی اختیار کی تھی۔ سری لنکائی کرکٹ ٹیم لاستھ ملنگا کی واپسی کے باوجود بھی مشکلات کا شکار ہے اور ایشیا کپ میں افغانستان اور بنگلہ دیش کے خلاف شکست کے بعد ٹورنمنٹ سے پہلے ہی مرحلے سے باہر ہو چکی ہے اور اسی صورتحال کو دیکھتے ہوئے دلشان ٹیم میں واپسی پر غور کر رہے ہیں۔ انہوں نے ایک انٹرویو میں کہا کہ سری لنکا ٹیم اس وقت مشکلات کا شکار ہے اس لئے میں ٹیم میں واپس آسکتا ہوں۔ انہوں نے مزید کہا کہ میں 2019 تک کھیلینا چاہتا تھا لیکن بہت سے مسائل کے باعث کنارہ کشی اختیارکی۔ دلشان نے 2016 میں اپنے کیرئیرکا آخری ٹی 20 میچ آسٹریلیا کیخلاف کھیلا تھا اور صرف ایک رن ہی بنا پائے تھے جبکہ پوری ٹیم 128 رنز بنا سکی اور میچ ہار گئی تھی۔
