میڈرڈ۔7 مارچ (سیاست ڈاٹ کام ) یورپ کے سب سے بڑے فٹبال ٹورنمنٹ چمپئنزلیگ میں سب سے بڑا حیران کن نتیجہ برآمد ہو گیا ہے اورگزشتہ 3برس سے چمپئنز لیگ کی چمپیئن ہسپانوی ٹیم رئیل میڈرڈ ہالینڈ کے کلب ایجکس کے خلاف شکست کھاکر پری کوارٹر فائنل مرحلے ہی میں لیگ سے باہر ہوگئی جبکہ ڈچ کلب کوارٹر فائنل میں پہنچ گیا۔ رئیل میڈرڈ 13 مرتبہ یہ لیگ جیت چکی ہے لیکن اس مرتبہ بنیادی فرق یہ تھا کہ اسے اپنے سب سے بڑے اسٹارکرسٹیانو رونالڈوکے بغیرکھیلنا پڑا اور اس کیلئے اعزازکا دفاع ناممکن ہوگیا ، دفاعی چمپیئن ٹیم ہوم گراونڈ پردوسرے مرحلے کے میچ میں 1-4کی بڑی شکست کے بعد مجموعی طور پر3-5 سے ہارکر ٹورنمنٹ سے ہی باہرہوگئی۔ پہلے مرحلے کے میچ میں اس نے1-2 سے کامیابی حاصل کی تھی اور عام تاثر یہی تھا کہ اس کے لئے دوسرا میچ جیتنا مشکل نہیں ہوگا جو اسی کے گراونڈ میں ہونا تھا لیکن تمام اندازے غلط ثابت ہو ئے۔ میڈرڈ میں کھیلے گئے میچ میں ڈچ کلب نے دونوں ہاف میں 2گول اسکورکئے جبکہ رئیل میڈرڈ کا واحد گول دوسرے ہاف میں ہوا پہلے ہاف کے دوران مراکشی کھلاڑی حکیم ضیائچ نے7ویں منٹ میں جبکہ ڈیوڈ نیریس نے 18ویں منٹ میں گول کرکے ٹیم کو دہری برتری دلائی جس کے بعد دوسرے ہاف میں ڈوسان ٹیڈچ نے 62 ویں منٹ میں گول کرتے ہوئے رئیل میڈرڈ کیلئے میچ میں واپسی مشکل کر دی۔ اگرچہ اس گول پر تنازعہ بھی ہوا تاہم ویڈیو اسسٹنٹ ریفری کی مدد سے گول درست ثابت ہوا۔ 8 منٹ بعد رئیل کے کھلاڑی مارکو ایسنسیو نے گول کرکے خسارہ کچھ کم کیا لیکن 2 ہی منٹ کے بعد ایجکس کے کھلاڑی لیسے شون نے اپنا پہلا اور ٹیم کا چوتھا گول کرکے میچ یکطرفہ کردیا اور دفاعی چمپیئن کیلئے لیگ سے باہر ہونے کی راہ ہموارکردی۔رئیل میڈرڈ نے ایک ہزار 11دن تک لیگ پر راج کیا لیکن اسے خطابات کی ہیٹ ٹرک کروانے والے رونالڈوکی عدم موجودگی راس نہیں آئی اور اس کیلئے کوارٹر فائنل کھیلنا بھی ممکن نہیں ہو سکا۔
