دبئی۔23ستمبر ( سیاست ڈاٹ کام ) دبئی حکام نے دبئی انٹر نیشنل ایئر پورٹ پہنچنے والے سعودی شہریوں کیلئے خصوصی مہر تیار کرائی ہے۔ یہ مملکت کے 88ویں یوم وطنی کے موقع پر سعودی بھائیوں کے ساتھ خصوصی برتاؤ کی روشن علامت ہے۔ 23ستمبر تک سعودی شہریوں کے پاسپورٹس پر یہی مہر لگائی جائیگی۔دبئی ایئرپورٹ پر 20ستمبر کو پہلی سعودی پرواز پہنچی تو معروف روایت کے ذریعے پانی کے چھڑکاؤ سے اس کا استقبال کیا گیا۔ متحدہ عرب امارات کے تمام ایئرپورٹ سعودی پرچموں اورخیر مقدمی کلمات سے سجے ہوئے ہیں۔
مملکت پر میزائل حملے بند کرنے پر ہی ایران سے بات چیت ممکن
ریاض۔23ستمبر ( سیاست ڈاٹ کام ) امریکی وزیر خارجہ نے واضح کیا ہے کہ جب تک ایران سعودی عرب پر میزائل حملے اور لبنانی حزب اللہ کو اسلحہ کی فراہمی بند نہیں کریگا تب تک اسکے ساتھ بات چیت نہیں ہوگی ۔امریکی وزیر نے الزام لگایا کہ حوثیوں کی مدد کرکے ایران، یمن میں امن عمل معطل کررہا ہے۔