ہمارے یہاں کی خواتین کی صحت قابل تعریف نہیں ہے۔ اگر ہم دیگر ممالک کی طرف نظر دوڑائیںتو ہم دیکھتے ہیں کہ وہاں کی خواتین چاہے پڑھی لکھی ہوں یا اَن پڑھ، امیر ہوں یا غریب، ان کی صحت بہت اچھی ہوتی ہے۔ وہ اپنی صحت کی طرف مکمل توجہ دیتی ہیں۔ ہمارے یہاں تو خواتین کی صحت کا بُرا حال ہے ۔
جیسے ہی خواتین کی عمر چالیس سال سے اُوپر کی ہوتی ہے، انھیں آہستہ آہستہ بلڈ پریشر، شوگر اور جوڑوں کے درد کی شکایت ہونے لگتی ہے۔چالیس سال میں اس طرح کی شکایت کی سب سے اہم وجہ کھانے پینے میں لاپرواہی ہے۔ اگر ہم پھلوں کا استعمال کریں تو اس سے ہمیں مستقل توانائی حاصل ہوتی ہے۔ اسی طرح اگر ہم مرچ مسالوں کا استعمال کم کریں تو ہمارا جسمانی نظام درست رہتا ہے۔اگر خواتین چھوٹی چھوٹی باتوں کا دھیان رکھیں تو ہماری آئندہ نسل کی عمر میں اضافہ ہوگا اور ہم خوشگوار زندگی گزار سکیں گے۔ صحت کا خیال رکھنے کے لئے یہ ضروری نہیں کہ بہت مہنگی غذا کھائی جائے۔ وقت پر کھانا، صاف ستھرا کھانا، اعتدال کے ساتھ کھانا بھی آپ کو صحت مند رکھنے کے لئے کافی ہوسکتا ہے۔ پھر سب سے اہم بات یہ کہ جب آپ صحت مند ہوں گی تو اپنے بچوں کی پرورش بھی اچھی طرح کرسکیں گی۔
