غزہ ، 11 جولائی (سیاست ڈاٹ کام) فلسطینی تنظیم حماس کے عسکری شعبہ نے دھمکی دی ہے کہ وہ اسرائیل میں بین گْوریان کے بین الاقوامی ہوائی اڈے کو غزہ پٹی سے راکٹ حملوں کا نشانہ بنا سکتا ہے۔ اس عسکریت پسند گروپ نے آج جمعہ کو جاری کردہ اپنے ایک ایک بیان میں کہا، ‘‘اسرائیل کی طرف سے غزہ کے شہریوں پر حملوں کی وجہ سے حماس تحریک نے اسرائیلی جارحیت کا جواب دینے کا فیصلہ کیا ہے۔’’ بیان میں تمام فضائی کمپنیوں کو خبردار کیا گیا ہے کہ وہ اسرائیل کے اس انٹرنیشنل ایئر پورٹ کی طرف پرواز نہ کریں۔ حماس کے بقول بین گْوریان کا ہوائی اڈہ اس کے اہداف میں سے ایک ہو گا۔ بیان میں کہا گیا ہے کہ اس ایئر پورٹ پر حملے کی وجہ وہاں قائم اسرائیلی فوجی اڈہ بھی ہے۔ قبل ازیں آج ہی حماس نے اس علاقے کی طرف ایک راکٹ فائر کرنے کا دعویٰ کیا تھا تاہم یہ اطلاع نہیں ہے کہ یہ راکٹ کہاں گرا۔
