لندن۔16 جولائی(سیاست ڈاٹ کام) سربیا کے ٹینس اسٹار نواک جوکووچ نے ومبلڈن اوپن کے فائنل میں کیون اینڈرسن کو راست سٹوں میں شکست دے کر چوتھی مرتبہ ومبلڈن اوپن مینز سنگلز چیمپیئن بننے کا اعزاز حاصل کر لیا اوراپنے کرئیر میں 13 ویں گرانڈ سلام خطاب بھی حاصل کرلیا ہے۔ لندن میں کھیلے گئے سال کے تیسرے گرانڈ سلام ٹینس ٹورنمنٹ کے فائنل میں سخت مقابلے کی توقع کی جا رہی تھی کیونکہ ان دونوں کھلاڑیوں نے سیمی فائنل میں اپنے حریف کو کئی گھنٹے تک جاری رہنے والے مقابلے کے بعد شکست دی تھی۔کیون اینڈرسن نے ساڑھے 6 گھنٹے تک جاری رہنے والے سیمی فائنل میں جان اسنر کو شکست دی اور یہ میچ ومبلڈن اوپن کی تاریخ کا دوسرا طویل ترین میچ تھا جبکہ عالمی نمبر ایک رافل نڈال کو زیر کرنے کے لیے جوکووچ کو 5گھنٹے سے زائد جدوجہد کرنا پڑی تھی۔جوکووچ نے غیرمعمولی کارکردگی کا مظاہرہ کرتے ہوئے حریف جنوبی افریقی کھلاڑی کیون اینڈرسن کو 2۔6 ، 2۔6 اور 6۔7 سے شکست دے کر خطاب اپنے نام کیا۔یہ ان کے کیریئر کا چوتھا ومبلڈن جبکہ مجموعی طور پر 13واں گرانڈ سلام ہے۔یہ جوکووچ کا گزشتہ دو برسوں کے دوران پہلا گرانڈ سلام خطاب ہے اور انہوں نے آخری مرتبہ 2016 میں فرنچ اوپن خطاب جیتا تھا۔اس خطاب کے ساتھ ہی جوکووچ زیادہ گرانڈ سلام سنگلز خطابات جیتنے والے دنیا کے چوتھے کھلاڑی بن گئے ہیں۔اس فہرست میں پہلے نمبر پر راجر فیڈرر ہیں جنہوں نے 20خطابات اپنے نام کیے ہیں، نڈال17 خطابات کے ساتھ دوسرے اور امریکہ کے پیٹ سمپراس 14 خطابات کے ساتھ تیسرے نمبر پر موجود ہیں۔آج جاری کردہ تازہ ترین درجہ بندی میں جوکوچ ٹاپ 10 میں واپس آگئے ہیں۔پہلے اوردوسرے مقام پر بدستور نڈال اور فیڈرر موجود ہیںاورجوکووچ 10 ویں مقام پر ہیں۔
