روم۔20 مئی (سیاست ڈاٹ کام) اسپین کے رافیل نڈال نے روایتی حریف سربیا کے نوواک جوکووچ کو شکست دے کر سال 2014 کے بعد پہلی بار اٹالین اوپن ٹینس ٹورنامنٹ کے فائنل میں داخلہ حاصل کر لیا ہے جہاں ان کا مقابلہ گزشتہ چمپئن الیگزینڈر زیویریو سے ہوگا۔ٹاپ سیڈ نڈال نے جوکووچ کو 7۔6، 6۔3 سے شکست دے کر فائنل میں جگہ بنائی اور اب وہ جرمن کھلاڑی زیویریو سے خطاب کیلئے نبرد آزما ہوں گے جنہوں نے چوتھی سیڈ کروشیا کے مارن سلچ کو 7۔6، 7۔5 سے سیمی فائنل میں شکست دی۔21 سالہ زیویریو نے گزشتہ ماہ میڈرڈ اوپن ٹائٹل جیت لیا تھا اور فی الحال بہترین فارم میں ہیں۔زیویریو کو اس سال فرانسیسی اوپن کا بھی ایک دعویدار مانا جا رہا ہے جہاں نڈال 10 بار کے چمپئن ہیں۔انہوں نے مسلسل 13 واں میچ جیت کے ساتھ فائنل میں داخلہ حاصل کر لیا ہے ۔نڈال اور چار بار کے اطالوی اوپن چمپئن جوکووچ کے درمیان سیمی فائنل میں یہ 51 واں مقابلہ تھا اور کہنی کی چوٹ سے برسرپیکار سربیائی کھلاڑی نے واپسی کے بعد سے اپنی بہترین کارکردگی کا مظاہرہ کیا۔اگرچہ وہ جیتنے میں کامیاب نہیں رہے ۔نڈال نے میچ کے بعد کہا کہ جوکووچ کے خلاف کھیلنا ہمیشہ مشکل ہوتا ہے ۔انہوں نے ہمیشہ کی طرح اچھی کارکردگی کی ۔ ان کے سامنے آپ ذرا بھی کمزور پڑے تو وہ آپ کو پریشانی میں ڈال سکتے ہیں۔سنگلز کے پہلے سیمی فائنل میں نڈال نے انتہائی شاندار کارکردگی کا مظاہرہ کرتے ہوئے جوکووچ کو اسٹریٹ سیٹ میں 7۔6 اور 6۔3 سے ہرا کر فائنل میں جگہ بنائی۔یاد رہے کہ گزشتہ برس اٹالین اوپن کے فائنل میں نوواک جوکووچ کو جرمن کھلاڑی الیگزینڈر زیوریف نے شکست دے کر چمپئن بننے کا اعزاز حاصل کرلیا تھا۔جرمنی کے نوجوان کھلاڑی نے اس وقت کے عالمی نمبر 2 جوکووچ کو اٹالین اوپن کے فائنل میں 4۔6، 3۔6 سے شکست دے کر ٹائٹل اپنے نام کر لیا تھا۔اس دوران انٹرنیشنل ٹینس فیڈریشن کی جانب سے رواں ہفتے کے آغاز میں جاری تازہ ترین اے ٹی پی اور ڈبلیو ٹی اے درجہ بندی میں راجر فیڈرر نے اپنے حریف رافیل نڈال کو پہلی پوزیشن سے محروم کر کے ایک مرتبہ پھر عالمی نمبر ایک بننے کا اعزاز حاصل کر لیا تھا۔آئی ٹی ایف نے میڈرڈ اوپن ٹینس ٹورنامنٹ کے بعد تازہ ترین اے ٹی پی اور ڈبلیو ٹی اے رینکنگ جاری کر دی جس کے تحت مردوں میں سوئس اسٹار راجر فیڈرر نے ایک درجہ ترقی پا کر نڈال سے ٹاپ پوزیشن چھین لی۔نئی رینکنگ میں نڈال تنزلی کے بعد دوسرے نمبر پر چلے گئے ہیں جبکہ جرمن کھلاڑی اور میڈرڈ اوپن کے چمپئن الیگزینڈر زیوریف تیسرے ، گریگور دمتروف چوتھے ، مارلن سیلس پانچویں اور جان مارٹن ڈیل پوٹرو چھٹے نمبر پر برقرار ہیں۔کیون اینڈرسن ایک سیڑھی چڑھ کر ساتویں نمبر پر آ گئے جبکہ سیم کیوری، باٹسٹا ایگٹ، جیک ساک اور ڈائیگو ایک، لیوکاس پاؤلی دو درجے ترقی کے ساتھ بالترتیب 12ویں، 13ویں، 14ویں، 15 اور 16ویں نمبر پر آ گئے ۔سابق عالمی نمبر ایک سربیا کے نوواک جوکووچ 6 درجے تنزلی کے بعد 18ویں نمبر پر چلے گئے جو ان کی 2006 کے بعد سے سب سے بدترین رینکنگ ہے جبکہ کائل ایڈمنڈ تین سیڑھیاں چڑھ کر 19ویں اور ہیون چنگ ایک درجہ ترقی پا کر 20ویں نمبر پر آ گئے ۔
