لاہور۔21 جون(سیاست ڈاٹ کام) سلیکشن کمیٹی پاکستانی کرکٹ ٹیم کے ہیڈ کوچ مکی آرتھر کی مشاورت سے زمبابوے کیخلاف ٹی ٹوئنٹی ٹرائی سیریز اور ونڈے میچوں کیلئے پاکستانی ٹیم کا انتخاب اگلے دو دن میں کرے گی۔ بولنگ ایکشن کلیئر ہونے کے بعد آل راؤنڈر محمد حفیظ کی ونڈے ٹیم میں واپسی یقینی ہے جبکہ جنید خان کا نام بھی زیر غور ہے۔ذرائع کے مطابق رومان رئیس،عماد وسیم اور یاسر شاہ بدستور ان فٹ ہیں لہٰذا تینوں پرغور نہیں ہوگا۔ مڈل آرڈر بیٹسمین بابر اعظم کی ٹی ٹوئنٹی سیریز میں شرکت کا کوئی امکان نہیں تاہم ونڈے سیریز میں ان کی شمولیت ممکن ہوسکتی ہے۔ آئی سی سی کی جانب سے بولنگ ایکشن کلیئر ہونے کے بعد محمد حفیظ کی ٹیم میں شمولیت یقینی ہے۔ فخر زمان اور امام الحق کی موجودگی میں اوپنرشان مسعود بھی پاکستان ٹیم میں شمولیت کیلئے مضبوط امیدوار اور اظہرعلی کے متبادل بن سکتے ہیں جو کامیاب ڈومیسٹک سیزن کے باوجود ان فٹ ہونے کی وجہ سے حالیہ دوروں کیلئے نظر انداز کردیئے گئے تھے۔ ٹی ٹوئنٹی میچوں میں احمد شہزاد کی غیر مستقل مزاج کارکردگی سے ٹیم انتظامیہ خوش نہیں لہٰذا انہیں خارج کیا جا سکتا ہے جبکہ فاسٹ بولر محمد عامر کو آرام دینے کی تجویز ہے تاہم مکی آرتھر اس بات کا فیصلہ کریں گے کہ محمد عامر کو آرام دیا جائے یا انہیں ونڈے ٹیم میں بھی حسب روایت شامل رکھا جائے۔
