کراچی۔23 جون(سیاست ڈاٹ کام)پاکستان نے دورہ زمبابوے کے لیے ٹی20 اور ونڈے ٹیم کا اعلان کردیا ہے اور صاحبزادہ فرحان پہلی مرتبہ ٹی20 ٹیم میں جگہ بنانے میں کامیاب ہوئے ہیں جبکہ احمد شہزاد کو خارج کردیا گیا ہے۔پاکستانی ٹیم دورہ زمبابوے میں سہ ملکی ٹی20 سیریز میں شرکت کرے گی جس میں میزبان ٹیم کے علاوہ آسٹریلیا بھی شریک ہو گی جس کے بعد پاکستان اور زمبابوے کے درمیان ون ڈے سیریز بھی کھیلی جائے گی۔پاکستان سوپر لیگ میں عمدہ کارکردگی دکھانے والے صاحبزادہ فرحان کو ٹی20 اسکواڈ کا حصہ بنایا گیا ہے جبکہ لیگ اسپنر یاسر شاہ بھی ایک عرصے بعد ونڈے ٹیم میں جگہ بنانے میں کامیاب ہو گئے ہیں۔نوجوان بابر اعظم کو ٹی20 ٹیم کا حصہ نہیں بنایا گیا اور ونڈے ٹیم میں بھی ان کی شمولیت فٹنس سے مشروط ہے جبکہ عماد وسیم اور رومان رئیس بھی زخمی ہونے کے سبب اسکواڈ میں جگہ نہ بنا سکے۔فاسٹ بولرجنید خان کی بھی ون ڈے ٹیم میں واپسی ہوئی ہے جبکہ مڈل آرڈر بیٹسمین آصف علی کو ونڈے ٹیم کا بھی حصہ بنا لیا گیا ہے۔نیز ٹی20 اور ونڈے ٹیم میں محمد حفیظ کی واپسی ہوئی ہے جو زخموں اور مشتبہ بولنگ ایکشن کے سبب ٹیم سے باہر کر دیے گئے تھے۔پاکستان، آسٹریلیا اور زمبابوے کے درمیان سہ ملکی سیریز یکم تا 8جولائی کھیلی جائے گی جس کے بعد پاکستان اور زمبابوے کے درمیان 13جولائی سے 5 ونڈے میچوں کی سیریز شروع ہو گی۔دورہ زمبابوے کے لیے پاکستانی ٹیم ان کھلاڑیوں پر مشتمل ہے۔ٹی20 ٹیم:سرفراز احمد(کپتان)، فخر زمان، صاحبزادہ فرحان، محمد حفیظ، حسین طلعت، شعیب ملک، آصف علی، حارث سہیل، شاداب خان، محمد نواز، فہیم اشرف، حسن علی، محمد عامر، عثمان خان شنواری اور شاہین شاہ آفریدی۔ون ڈے ٹیم:سرفراز احمد(کپتان)، فخر زمان، بابر اعظم، امام الحق، محمد حفیظ، شعیب ملک، آصف علی، حارث سہیل،شاداب خان، محمد نواز، یاسر شاہ، فہیم اشرف، حسن علی، محمد عامر، عثمان خان شنواری اور جنید خان۔
