لاس ویگاس۔15 اکٹوبر (سیاست ڈاٹ کام ) حال ہی میں مکس مارشل آرٹ کے آئرش باکسر میک گوریگور کو شکست کا ذائقہ چکھانے والے باکسرخبیب نورماگومیدوف نے اب فلائیڈ مے ویدر کو شکست دینے پر توجہ مرکوز کرلی ہیں۔ سماجی رابطے کی ویب سائٹ انسٹاگرام پر روسی باکسرکے پروموٹر کی پوسٹ کی گئی ویڈیو میں انہو ںنے کہا کہ ’چلو اٹھو فلائیڈ ، اب ہمیں لڑنا ہے۔ خیال رہے کہ روسی باکسر نے میک گریگور کو 6 اکتوبر کو شکست دی تھی جو گزشتہ برس فلائیڈ میویدر کے خلاف شکست کے بعد اپنا پہلا میچ لڑ رہے تھے۔یہ بات بھی دلچسپ ہے کہ روسی باکسرخبیب کا اب تک کا ریکارڈ 0۔27 ہے جبکہ انہوں نے جس امریکی باکسر کو چیلینج کیا ہے ان کا ریکارڈ اب تک 0۔50 ہے یعنی دونوں باکسرز کو اب تک لڑی جانے والی تمام لڑائیوں میں سے ایک میں بھی شکست نہیں ہوئی اور دونوں ہی ناقابل شکست ہیں۔ گزشتہ لڑائی میں خبیب نے میک گریگور کو جیت سے قبل ایک طاقتور مکا رسید کر کے ان کی گردن دبوچ لی تھی جس سے وہ بالکل بے بس ہوگئے تھے۔ ادھر فلائیڈ میویدر اور میک گوریگور کی لڑائی کے دسویں راؤنڈ میں امریکی باکسر آئرش باکسر کو زیر کرنے میں کامیاب ہوئے تھے جس کا حوالہ دیتے ہوئے خبیب نے کہا کہ میں ہی بادشاہ ہوں کیوں کہ وہ میک گوریگور کو گرانے میں کامیاب نہیں ہوسکے تھے لیکن میں نے انہیں چت کردیا تھا۔ یاد رہے کہ لاس ویگاس میں ہوئی لڑائی کے دوران مشتعل ہوجانے پر خبیب اور میک گوریگور ، دونوں کو نیواڈا اسٹیٹ اتھلیٹ کمیشن کی جانب سے تحقیقات مکمل ہونے تک معطلی کا سامنا ہے۔
