جوہانسبرگ ۔7 ڈسمبر (سیاست ڈاٹ کام ) جنوبی افریقہ نے پاکستان کے خلاف ٹسٹ سیریز کے لئے 13رکنی اسکواڈ کا اعلان کردیا ہے اور نوجوان بیٹسمین زبیر حمزہ کو پہلی مرتبہ اسکواڈ میں شامل کر لیا گیا ہے۔ زبیر حمزہ تیسرے مقام پر بیٹنگ کرنے والے نوجوان بیٹسمین ہیں اورگزشتہ 18ماہ سے بہترین فارم کا مظاہرہ کرتے ہوئے رنز کے ڈھیر لگا چکے ہیں اور اسی شاندار کارکردگی پر انہیں ٹسٹ اسکواڈ کا حصہ بنایا گیا ہے۔ دوسری جانب زخموں کا شکار لنگی نگیدی کی جگہ فاسٹ بولر ڈووان اولیویئر کو اسکواڈ میں جگہ دی گئی ہے جو پانچ ٹسٹ میچ کھیل چکے ہیں اور 90 فرسٹ کلاس میچوں میں 361 وکٹیں لینے کا اعزاز رکھتے ہیں۔ فاف ڈیوپلیسی کو کپتان برقرار رکھا گیا ہے جبکہ ورنان فلینڈر، کگیسو ربادا اور ڈیل اسٹین بھی اسکواڈ میں شامل ہیں۔ جنوبی افریقہ کے 13 رکنی اسکواڈ میں کپتان فاف ڈوپلیسی، ہاشم آملہ، ٹیمبا باووما، تھیونس ڈی برون، کوئنٹن ڈی کوک، ڈین ایلگر، زبیر حمزہ، کیشپ مہاراج، ایڈن مارک رام، ڈووان اولیویئر، ورنان فلینڈر،کگیسو ربادا اور ڈیل اسٹین شامل ہیں۔ پاکستان کرکٹ ٹیم کی نیوزی لینڈ سے سیریز کے بعد اگلی منزل جنوبی افریقہ کے میدان ہیں جہاں پاکستان ٹیم کو تین ٹسٹ اور پانچ ونڈے میچز کی سیریز کھیلنی ہے۔ پاکستان اور جنوبی افریقہ کے درمیان سیریز کا پہلا ٹسٹ میچ 26 دسمبر کو سنچورین میں کھیلا جائے گا۔ سیریز کا دوسرا ٹسٹ میچ تین جنوری کو کیپ ٹاؤن اور سیریز کا تیسرا اور آخری ٹسٹ میچ 11جنوری کو جوہانسبرگ میں کھیلا جائے گا۔
