لندن /31 جولائی (سیاست ڈاٹ کام) ثقلین مشتاق نے چنددن کی کوچنگ میں ہی انگلینڈکا دل جیت لیا، کوچ ٹریور بیلس آف اسپنرکی خدمات پاکستان کے خلاف باقی 2 ٹیسٹ میچز کیلئے بھی حاصل کرنے کے خواہاں ہیں، انھوں نے کہاکہ ہماری خوش قسمتی ہے کہ ہمیں سابق پاکستانی آف اسپنرکا ساتھ میسر آیا، اس اقدام سے معین علی اور عادل رشید دونوں ہی ان سے کافی خوش ہیں۔انگلینڈ نے ثقلین مشتاق کی خدمات مانچسٹر کے اولڈ ٹریفورڈ سٹیڈیم میں کھیلے گئے دوسرے ٹیسٹ کی خاطر ایک ہفتے کیلئے حاصل کی تھیں، انھوں نے میچ سے 2،3 روز قبل ٹیم کو جوائن کیا، ان کی کوچنگ کا یہ اثر ہوا کہ لارڈز میں شکست سے دوچار ہونے والی انگلش ٹیم نے شاندار کم بیک کرتے ہوئے 330 رنز کی بڑی فتح کو گلے لگایا، اس میں خاص طور پر پاکستانی ہتھیار یاسر شاہ بے کار ہوکر رہ گئے جبکہ آٹ آف فارم انگلش اسپنر معین علی چند اہم وکٹیں حاصل کرنے میں کامیاب رہے تھے۔اب میزبان ٹیم مینجمنٹ
ثقلین کی خدمات باقی دو ٹیسٹ میچز کیلیے بھی حاصل کرنے کی خواہاں ہے۔ کوچ ٹریور بیلس ڈائریکٹر کرکٹ اینڈریواسٹروس کو مشورہ دیں گے کہ پاکستانی آف اسپنر کا انگلش ٹیم کے ساتھ مزید قیام فائدہ مند ثابت ہوسکتا ہے، بیلس نے کہاکہ معین اور عادل رشید دونوں ہی ثقلین کے ساتھ کام کرکے کافی لطف اندوز ہوئے، ان کا ساتھ کافی مثبت رہا، اس لیے ہم ان کی مزید خدمات حاصل کرنا چاہتے ہیں، ہمارے کھلاڑیوں کو بہت زیادہ ٹیکنیکل کوچنگ کی ضرورت نہیں ہے۔ثقلین نے ایک دوچیزیں ایسی بتائیں جو تکنیکی نہیں بلکہ تدبیری نوعیت کی تھیں، وہ ایک طرح سے کچھ حربے تھے جو ہمارے کام آئے، ہم چاہتے ہیں کہ معین اور عادل رشید دونوں کے ہی کھیل میں زیادہ بہتری آئے۔ بیلس نے مزید کہا کہ ہماری خوش قسمتی ہے کہ ہمیں ثقلین جیسے سابق کھلاڑی کا ساتھ میسر آیا، ایسے عظیم کھلاڑیوں کیلئے فل ٹائم وقت نکالنا مشکل ہوتا ہے،اس لیے ان کی سیریز درسیریز خدمات حاصل کرنا فائدہ مند ثابت ہوگا۔
