نئی دہلی ، 5 مئی (سیاست ڈاٹ کام) ہندوستانی ٹینس اسٹار ثانیہ مرزا نے کہا ہے کہ وہ ٹینس سے دور نہیں رہنا چاہتیں اور ماں بننے کے بعد بھی ٹینس جاری رکھیں گی اور2020 ٹوکیو اولمپکس میں شرکت کیلئے پر عزم ہیں۔ ایک انٹرویو میں ٹینس کوئین ثانیہ نے کہا کہ وہ گزشتہ سال اکتوبر میں گھٹنے کی انجری کا شکار ہوئیں جس کے بعد سے وہ ٹینس سرکٹ سے بھی دور ہوگئیں لیکن اب ان کی نظریں 2020 ٹوکیو اولمپکس پر مرکوز ہیں ۔ثانیہ نے کہا کہ اگرچہ وہ ماں بننے والی ہیں لیکن وہ اس کے بعد بھی ٹینس جاری رکھنا چاہتی ہیں ۔ انہوں نے کہا کہ 2020 میں جاپان میں ہو نے والے اولمپکس گیمز میں شرکت کرکے تمام خواتین کیلئے مثال قائم کرنا چاہتی ہیں۔ واضح رہے کہ گزشتہ ماہ ثانیہ مرزا اور ان کے شوہر شعیب ملک نے ٹوئٹر پر ’’ننھے مہمان‘‘ کی آمد کی خوشخبری سنائی تھی۔ دونوں 2010 ء میں شادی کے بندھن میں بندھے تھے ۔
