ہندوستانی اسٹار کے کریئر کا 25 واں ڈبلز ٹائٹل ۔ عالمی نمبر ایک رینک سے ثانیہ صرف 145 پوائنٹس دور
میامی ، 6 اپریل (سیاست ڈاٹ کام) ہندوستان کی ٹینس اسٹار ثانیہ مرزا اور سوئٹزرلینڈ کی مارٹینا ہنگس نے میامی اوپن ٹینس ٹورنمنٹ میں خواتین کا ڈبلز ٹائٹل جیت لیا ہے۔ یہ ثانیہ کے کریئر کا 25 واں ڈبلز ٹائٹل ہے۔ خواتین کے ڈبلز میں پہلی رینکنگ رکھنے والی ثانیہ اور ہنگس کی جوڑی نے درجہ بندی میں دوسرے نمبر پر موجود روس کی ایکاترینا ماکرووا اور ایلینا ویزنینا کی جوڑی کو شکست دی۔ ثانیہ جوڑی نے روسی حریفوں کو 5-7 اور 1-6 سے شکست دی۔ پہلے سٹ میں 2-5 سے پچھڑنے کے بعد انھوں نے شاندار واپسی کی اور مسلسل آٹھ گیمز میں کامیابی حاصل کرکے سٹ پر قبضہ کر لیا۔ ثانیہ نے میچ کے بعد کہا: ’’ہم ایک دوسرے کو یہ کہہ رہے تھے کہ اس جدد و جہد کو جاری رکھیں۔ گزشتہ ہفتے سب کچھ بہت آسانی سے حاصل ہو گیا تھا اور ہم کسی بھی سٹ میں چار گیمز سے زیادہ نہیں ہارے تھے لیکن یہاں ہم قدرے گھبرا رہے تھے‘‘۔ یہ ثانیہ کے کریئر کا 25 واں ڈبلز خطاب ہے اور اب وہ ڈبلز میں انفرادی طور پر پہلا مقام حاصل کرنے سے صرف 145 پوائنٹس پیچھے ہیں۔ انھوں مزید کہا کہ ’’ایسا لگ رہا تھا کہ ہم اچھا نہیں کھیل رہے ہیں اور ہم عام طور پر اس کے عادی نہیں ہیں‘‘۔ ہنگس نے اس جیت کیلئے ثانیہ کے والد عمران مرزا کا شکریہ ادا کیا، جنھوں نے میچ کے دوران انھیں چند نکات بتائے۔ اس سے قبل ثانیہ اور ہنگس کی جوڑی نے روسی جوڑی کو ہی فائنل میں شکست دے کر انڈین ویلز کا خطاب بھی جیتا تھا۔ انڈین ویلز ثانیہ اور ہنگس کا ایک ساتھ پہلا ٹائٹل تھا۔ خاص بات یہ ہے کہ ثانیہ اورہنگس نے جب سے ڈبلز کی جوڑی بنائی ہے، انھیں اب تک ایک بھی سٹ میں شکست نہیں ہوئی ہے۔ انفرادی ڈبلز رینکنگ میں ورلڈ نمبر ون بننے سے ثانیہ اب 145 پوائنٹس دور ہیں اور وہ ابھی تیسرے نمبر پر ہیں، جبکہ ایک اور دو پر مشترکہ طور پر اٹلی کی سارا ایرانی اور روبرٹا وینسی ہیں۔ ہنگس کے ساتھ اپنے لگاتار دوسرے خطاب پر ثانیہ کے اب 7495 پوائنٹس ہیں اور انھیں اس ہفتے شروع ہونے والا فیملی سرکل کپ، چارلسٹن جیتنا ہوگا۔
