تہران۔12جون ( سیاست ڈاٹ کام ) ایران کے دارلحکومت تہران میں پولیس نے کیفے اور ہوٹلوں میں ورلڈ کپ کے مقابلے دکھانے پر پابندی عائد کر دی ہے۔ایرانی نیوز ویب سائٹ کے مطابق اس پابندی کا اطلاق ایران کیمقابلوںپر بھی ہوگا۔ ایران کی کیفے یونین نے تمام ممبران سے کہا ہے کہ وہ ورلڈ کپ کی نشریات کے دوران اپنے چینل تبدیل کر دیں یا پھر ٹی وی ہی بند کر دیں۔کیفے مالکان کو ایس ایم ایس کے ذریعہ کہا گیا ہے کہ وہ رات 12 بجے کے بعد کیفے کھلا نہیں رکھ سکتے۔سرکاری خبر رساں ادارے کے مطابق بہت سے کیفے اس پابندی کا اطلاق کرنے کے لیے تیار نہیں ہیں۔شہر کے ہوٹلوں کی ایک مختلف یونین نے کہا ہے کہ ہوٹل مالکان اگر میچ دیکھنے والے شائقین پر قابو پالیں تو وہ میچ دکھا سکتے ہیں۔یاد رہے کہ گذشتہ ہفتے ایرانی پولیس نے ملک بھر کے سینما گھروں میں مردوں اور عورتوں کے ایک ساتھ فٹبال ورلڈ کپ کے میچ دیکھنے پر پابندی عائد کر دی تھی جس کے بعد سینما مالکان نے بیان جاری کیا کہ وہ مردوں اور عورتوں کے لیے الگ الگ میچ نہیں دکھائیں گے۔تاہم ایرانی شائقین ورلڈ کپ کے میچ ایران کے مختلف پارکوں میں بڑی اسکرینوں پر اور اپنے گھروں میں دیکھ سکیں گے۔
