فیصل آباد ، 8 ڈسمبر (سیاست ڈاٹ کام) فیصل آباد میں تحریک انصاف کے احتجاج کے دوران ناولٹی پل پر فائرنگ سے زخمی ہونے والا22سال کا نوجوان جاں بحق ہو گیا۔ حالات مزیدکشیدگی کی طرف جا رہے ہیں۔ بعض مقامات پر نواز لیگ اور پی ٹی آئی کارکنوں میں تصادم ہوا جو دوسرے علاقوں تک پھیلتا جارہا ہے۔ ناولٹی پل پر فائرنگ سے2 افراد زخمی ہوگئے تھے۔ مظاہرین کو منتشر کرنے کیلئے واٹر کینن کا استعما ل کیا گیا۔ فیصل آباد بند کرنے کے اعلان کے باجود شہر میں صبح معمول کے مطابق سرگرمیاں شروع ہوئیں۔ سڑکوں پر ٹریفک اور بچے اور اسکول جاتے نظر آئے۔ مگر پھر تحریک انصاف کے کارکن حرکت میں آگئے۔ سڑکوں پر ٹائر پھینک کر آگ لگائی اور ٹریفک بلاک کردی۔اسکول بھی زبردستی بند کرانے کی کوشش کی گئی۔متعدد مقامات پر مظاہروں اور دھرنوں کا سلسلہ 9 مقامات تک پھیل گیا۔ اتنے میں نواز لیگ کے کارکن بھی مدمقابل آگئے۔مخالف نعرے بازی، دھکم پیل اور گر ما گرمی شروع ہوگئی۔ بعض جگہوں پر ڈنڈوں اور انڈوں کا بھی استعمال ہوا۔
