قاہرہ۔ 25 مارچ (سیاست ڈاٹ کام)قاہرہ کے جنوب میں واقع صوبہ الفیوم کے پراسیکیوٹرز نے ایک استانی کو بغیر حجاب کے سکول آنے والی لڑکی کے بال کاٹنے کے جرم میں چار دن قید کی سزا دے کر مزید تحقیقات کا حکم دے دیا ہے۔مصری حکام نے بچی کے والدین کی جانب سے شکایت کرنے پر مذکورہ استانی اور سکول کے ہیڈ ماسٹر کو بھی معطل کردیا۔ بچی کے والدین کے مطابق اس کی اسلامیات کی ٹیچر نے اسے حجاب نہ پہننے کی پاداش میں مارا تھا اور اس کے بالوں کو کٹر کی مدد سے کاٹ دیا۔ بچی کی والدہ نے خانگی ٹی وی سے بات کرتے ہوئے کہا کہ بچی واقعہ کے بعد سے انتہائی خراب نفسیاتی حالت میں ہے۔والدہ کے مطابق "استانی نے یہ فعل دوسرے طلباء کے سامنے کیا اور باقی طلباء اس وقت قہقہے لگا رہے تھے۔ میری بیٹی ابھی تک بچی ہے۔ وہ تب تک حجاب نہیں پہنے گی جب تک اسے قائل نہیں کیا جائے گا۔” مصری وزارت تعلیم کے مطابق اسکولوں میں حجاب پہننا لازمی نہیں ہے۔
