بیونس آئرس ۔ 13 مارچ۔(سیاست ڈاٹ کام)ارجنٹینا میں دو ہیلی کاپٹر فضا میں آپس میں ٹکرا گئے اور اس حادثے میں ہلاک ہونے والے دَس افراد میں فرانس کے سرفہرست 3 کھلاڑی بھی شامل ہیں۔ فرانس میں اس واقعہ پر گہرے دکھ کا اظہار کیا جا رہا ہے۔فرانسیسی صدارتی دفتر سے جاری کردہ ایک بیان کے مطابق ہلاک ہونے والوں میں معروف خاتون کشتی ران فلورنس آرتھو، اولمپک خاتون پیراک کامی موفا اور باکسر الیکسی واسٹین شامل ہیں۔ ان اسٹار کھلاڑیوں کی لاشیں ملبے سے برآمد کر لی گئی ہیں۔ یہ حادثہ ارجنٹینا دارالحکومت بیونس آئرس سے 1100 کلومیٹر شمال میں واقع لا رِیوخا کے پہاڑی علاقے میں پیش آیا جو اپنے خوبصورت مناظر کی وجہ سے سیاحوں میں بہت مقبول ہے۔ ہلاک ہونے والے افراد ایک فرانسیسی ریالٹی شو کی شوٹنگ کے سلسلے میں ارجنٹینا کے اِس دُور دراز علاقے میں گئے ہوئے تھے۔حادثہ کی وجوہات کا ہنوز پتہ نہیں چل پایا ہے۔ دونوں ہیلی کاپٹروں پر سوار افراد میں سے کوئی ایک بھی زندہ نہیں بچا ہے۔ زمین سے بنائی جانے والی غیر پیشہ ورانہ فوٹیج میں دکھایا گیا ہے کہ دونوں ہیلی کاپٹر بظاہر ایک دوسرے کے آگے پیچھے پرواز کر رہے تھے، پھر غالباً اچانک اُن میں سے ایک ہیلی کاپٹر اپنے راستے سے ہَٹ کر دوسرے ہیلی کاپٹر کے سامنے آگیا۔ دونوں ہیلی کاپٹر ایک دوسرے سے ٹکرا کر نیچے زمین پر جا گرے۔ایک اور ویڈیو میں دکھایا گیا ہے کہ کیسے درجنوں افراد گھنی جھاڑیوں میں سے تیزی سے بھاگتے ہوئے ہیلی کاپٹروں کے جلتے ہوئے ملبے کی طرف بڑھ رہے تھے۔ یہ حادثہ ارجنٹینا کے مقامی وقت کے مطابق شام 5:15 بجے پیش آیا۔فرانسیسی صدارتی دفتر کی جانب سے جاری کردہ ایک بیان میں کہا گیا ہے ہمارے ہم وطن فرانسیسیوں کی اچانک موت ہمارے لئے انتہائی غم کا باعث ہے۔
