ڈھاکہ ، 23 اپریل (سیاست ڈاٹ کام) بنگلہ دیش کرکٹ بورڈ نے آئندہ برس پاکستان کے مجوزہ دورے کو جنوری کی بجائے اپریل تک آگے بڑھادیا۔ اس کا سبب بنگلہ دیشی کرکٹرز کو 2015 کے فروری ، مارچ میں آسٹریلیا اور نیوزی لینڈ میں ٹریننگ کیلئے دو ہفتے قبل بھیجنا بتائی جارہی ہے۔ یہ فیصلہ بی سی بی کی کرکٹ آپریشنز کمیٹی نے منگل کو اپنے اجلاس میں کیا، جس میں انھوں نے آئندہ 12 ماہ کیلئے اپنے انٹرنیشنل اور ڈومیسٹک شیڈول کو ترتیب دیا ہے۔ پاکستان کو اس مجوزہ دورے کی تاریخوں میں ہونے والے ردوبدل پر باضابطہ طور پر بورڈ اجلاس میں منظوری ملنے کے بعد آگاہ کیا جائیگا۔ ابتدائی پروگرام کے مطابق پاکستان کرکٹ ٹیم نے جنوری 2015 میں بنگلہ دیش جانا تھا لیکن بنگلہ دیش بورڈ چاہتا ہے کہ فروری ، مارچ میں ہونے والے ورلڈکپ کی تیاریوں کیلئے اپنے پلیئرز کو دو ہفتے قبل ہی آسٹریلیا ، نیوزی لینڈ پہنچادے تاکہ کھلاڑی کھلاڑی وہاں موسم سے ہم آہنگ ہوسکیں۔
