برسلز ۔19 ڈسمبر (سیاست ڈاٹ کام )ہاکی کا ورلڈ کپ جیتنے کے بعد بلجیئم کی ہاکی ٹیم کا برسلز میں زبردست استقبال کیا گیا۔ ہزاروں افراد اس کی سینٹرل کمیون (1000 برسلز ) میں اکٹھے ہوئے۔ جہاں سب سے پہلے مئیر فلپ کلاز اور دیگر حکام نے اس کا استقبال کیا۔ بعد ازاں ٹیم کے ارکان باری باری گیلری میں آتے رہے اور عوام ان کا استقبال کرتے رہے۔ سب سے آخر میں ٹیم کے کپتان ٹرافی کے ساتھ نمودار ہوئے جس کے بعد عوام کا جوش و خروش دیکھنے کے قابل تھا۔ عوام نے انتہائی خوشی اور نعروں کے ساتھ ان کا استقبال کیا۔ بعد ازاں بلجیئم کے قومی ترانوں کے ساتھ تقریب اختتام پذیر ہوئی۔ اس موقع پر بیلجیئم کی فضائیہ کے چار طیاروں نے فلائی پاسٹ بھی کیا۔ قبل ازیں صبح 6 بجکر 45 منٹ پر جب ہاکی ٹیم وطن واپس پہنچی تو انہیں سیدھا شاہی محل لیجا یا گیا جہاں کنگ فلپ اور کوئین ماتھلڈ نے انہیں خوش آمدید کہا۔یاد رہے کہ ہاکی کی تاریخ میں بلجیئم کی یہ پہلی سب سے بڑی کامیابی ہے جو اس نے ہندوستانی شہر بھونیشور میں نیدر لینڈ کے خلاف 3-2 گول سے حاصل کی۔
