ساؤپالو ، 20 اپریل (سیاست ڈاٹ کام) برازیل میں پولیس حکام کا کہنا ہے کہ ساؤپالو میں مقامی فٹبال کے آٹھ شائقین کو ہلاک کر دیا گیا ہے۔ انھوں نے بتایا کہ مقامی کلب کے حامیوں کو نامعلوم مسلح افراد نے اُس وقت نشانہ بنایا جب وہ میچ کیلئے بیانرز تیار کر رہے تھے۔ حملہ آوروں نے گولیاں چلانے سے قبل ان افراد کو سیدھے لیٹ جانے کا حکم دیا۔ پولیس کے مطابق امکان ہے کہ ان آٹھ افراد کو منشیات کے سلسلے میں گولیاں ماری گئی ہیں۔ عینی شاہدین کا کہنا ہے کہ ہفتہ اور اتوار کی درمیانی شب تین مسلح افراد فٹبال کلب کی عارضی عمارت میں داخل ہوئے تھے۔ ساؤپالو پولیس کا کہنا ہے کہ مقامی فٹبال کلب کے جرائم پیشہ گروہ سے تعلقات تھے اور یہ حالیہ قتل بھی فٹبال کی وجہ سے نہیں بلکہ منشیات کی اسمگلنگ کے سبب کیا گیا ہے۔ تفتیش کرنے والے پولیس اہلکار نے بتایا کہ ’’عینی شاہدین کی مدد سے ہم تحقیقات کررہے ہیں اور ہمارے خیال میں یہ دشمنی کلب کی حمایت کرنے کی بنیاد پر نہیں ہے‘‘۔ برازیل میں فٹبال کے دوران پُر تشدد واقعات میں اضافہ ہوا ہے اور کئی بڑے شہروں میں شائقین نے فٹبال کلب پر جرائم میں ملوث ہونے کے الزامات عائد کئے ہیں۔
