ماسکو۔19جولائی (سیاست ڈاٹ کام) فیفا ورلڈ کپ 2018 کا سماجی رابطوں کی ویب سائٹ ٹوئٹر پر بھی خوب چرچا رہا اور برازیل اور اس کے اسٹار فٹبالرز ٹورنمنٹ کے دوران ٹوئٹر پر سب پر بازی لے گئے۔ورلڈ کپ اپنے تمام تر دلچسپ مقابلوں اور شاندار لمحات کے ساتھ اختتام پذیر ہو گیا جہاں فرانس نے کروشیا کو شکست دے کر دوسری مرتبہ عالمی چیمپیئن بننے کا اعزاز حاصل کیا۔ورلڈ کپ کا سوشل میڈیا پر بھی بہت چرچا رہا خصوصاً ٹوئٹر پر لوگوں نے ورلڈ کپ میں ہونے والے حیران کن نتائج، یادگار لمحات اور تنازعات پر اپنی آرا کا اظہار کیا۔ٹوئٹر کی جانب سے جاری اعدادوشمار کے مطابق ورلڈ کپ کے حوالے سے سماجی رابطوں کی ویب سائٹ پر 115ارب ٹوئٹ کی گئیں جس میں سب سے زیادہ ٹوئٹ اتوار کو ہوئے فائنل کے دن کی گئیں۔ٹوئٹر نے اپنے بیان میں کہا کہ ہمیں لائیو میچز کے دوران سب سے زیادہ ٹوئٹ اور لوگوں کے درمیان گفتگو دیکھنے کو ملی جبکہ سب سے زیادہ ٹوئٹ فرانس اور کروشیا کے درمیان ہونے والے فائنل میچ کے دوران کی گئیں۔برازیل اور بیلجیئم کی ٹیموں کے درمیان کوارٹر فائنل میچ میں بھی بے انتہا ٹوئٹ کی گئیں اور یہ میچ فہرست میں دوسرے نمبر پر رہا جبکہ اس فہرست میں تیسرا میچ برازیل اور میکسکو کے درمیان کھیلا گیا پری کوارٹر فائنل میچ رہا جس میں برازیل نے 0-2 سے کامیابی حاصل کی تھی۔بیلجیئم کے خلاف کوارٹر فائنل میں شکست کے سبب برازیل کی ٹیم ٹرافی تو نہ جیت سکی لیکن یہ ٹیم ٹوئٹر پر سب سے زیادہ مباحثوں کا حصہ رہی۔ٹوئٹر پر جن ٹیموں کا سب سے زیادہ حوالہ دیا گیا ان میں برازیلی ٹیم سرفہرست رہی جبکہ دوسرے نمبر پر فرانس، تیسرے پر ارجنٹینا،چوتھے پر انگلینڈ اور پانچویں پر پرتگال کی ٹیم رہی۔ورلڈ کپ میں جس کھلاڑی کا سب سے زیادہ تذکرہ کیا گیا وہ بھی برازیل کے ہی نیمر جونیئر ہیں جنہیں ان کے زخمی ہونے کے ڈراموں کی وجہ سے خاصی تنقید کا نشانہ بنایا گیا۔فہرست میں دوسرے نمبر پر لیونل میسی، تیسرے پرکرسٹیانو رونالڈو، چوتھے پر برازیل کے کوٹنہو اور پانچویں پر فرانس کے کائلیان ایمباپے رہے۔صرف یہی نہیں بلکہ ورلڈ کپ میں زیادہ ٹوئٹس میں بھی برازیل بازی لے گیا اور سب سے زیادہ ٹوئٹس اسی ملک کے عوام نے کیں جس کے بعد فہرست میں جاپان، انگلینڈ، امریکہ اور فرانس شامل ہیں۔ورلڈ کپ میں جس موقع یا جس لمحے پر سب سے زیادہ ٹوئٹس کی گئیں وہ ورلڈ کپ فائنل میں کائلیان ایمباپے کی جانب سے کیا گیا گول ہیس کی بدولت فرانس نے میچ میں 1-4 کی برتری حاصل کی تھی اور اس موقع پر ورلڈ کپ کے دوران فی منٹ سب سے زیادہ ٹوئٹس کی گئیں۔اس فہرست میں دوسرا نمبر فلپ کوٹنہو کی جانب سے کوسٹاریکا کے خلاف انجری ٹائم میں کیے گئے گول کا ہے۔تیسرے نمبر جرمنی کی جنوبی کوریا کے خلاف 0-2 سے حیران کن شکست کا ہے۔انسٹاگرام نے بھی اس حوالے سے اعدادوشمار جاری کیے ہیں۔
