دبئی۔5 نومبر (سیاست ڈاٹ کام ) پاکستانی اوپنر بابراعظم نے ٹی 20 کرکٹ میں تیز ترین ایک ہزار رنزبنانے کا نیا عالمی ریکارڈ بنادیا اور اس دوڑ میں انہوں نے ہندوستانی کپتان ویراٹ کوہلی کو پیچھے چھوڑدیا۔ بابراعظم نے اپنے کیرئر کے 26 ویں اننگز میں ایک ہزار رنز مکمل کرکے کوہلی کا عالمی ریکارڈ توڑدیا۔ بابراعظم نے نیوزی لینڈ کیخلاف تیسرے ٹی ٹوئنٹی میچ میں یہ اعزاز حاصل کیا۔اس سے قبل ٹی ٹوئنٹی میں تیزترین ہزار رنز کا ریکارڈ کوہلی کے پاس تھا جنہوں نے ٹی ٹوئنٹی کی 27 اننگز میں ایک ہزار رنز مکمل کئے تھے۔ میچ کھیلنے کے اعتبار سے یہ بابر اعظم کا 26 واں ہی میچ تھا جبکہ کوہلی نے 29 میچز میں یہ کارنامہ انجام دیا ہے۔ واضح رہے کہ نوجوان اوپنر بابر اعظم ونڈے کرکٹ میں بھی تیز ترین ایک ہزار رنز مکمل کرنے والے کھلاڑیوں میں مشترکہ طور پر دوسرے نمبر پر ہیں۔بابراعظم نے یہ اعزاز 21 ویں اننگز میں حاصل کیا تھا، جبکہ اس فارمیٹ میں تیز ترین ایک ہزار رنز بنانے کا ریکارڈ پاکستان کے ہی فخر زمان کے پاس ہے جنہوں نے محض 18 اننگز میں یہ ریکارڈ اپنے نام کیا تھا۔ آئی سی سی کی جانب سے بھی بابر اعظم کو ٹی 20 میں تیز ترین رنز اسکور کرنے پر مبارک باد پیش کی گئی۔