کولمبو۔24جولائی(سیاست ڈاٹ کام)جنوبی افریقہ کے کپتان فاف ڈ و پلیسی نے کہا ہے کہ برصغیر کے دورے میں صرف ایک اسپنر کے ساتھ کھیلنا ہماری فاش غلطی تھی جس کا ہمیں خمیازہ بھی بھگتنا پڑا۔ سری لنکا کے خلاف ٹسٹ سیریز پر اظہار خیال کرتے ہوئے انہوں نے کہا کہ سری لنکن ٹیم نے کھیل کے ہر شعبے میں ہمیں مات دی جس پر وہ داد کی مستحق ہے لیکن ہماری غلطی یہ تھی کہ ہم صرف ایک اسپنر کے ساتھ کھیلے۔ ڈوپلیسی نے کہا کہ کیشو مہاراج کی عمدہ کارکردگی اور12 وکٹوں نے واضح کردیا کہ ہمیں ان کے ساتھ ایک اور اسپنر بھی ٹیم میں شامل کرنا چاہئے تھا۔ سری لنکا نے3اسپنرز کی خدمات حاصل کیں اور فرق صاف ظاہر ہے کہ ہم انکا ڈٹ کر مقابلہ نہ کرسکے۔انہوں نے کہا کہ بر صغیر میں مضبوط اسپن شعبہ کے بغیر کسی غیر ملکی ٹیم کا کامیاب ہونا آسان نہیں ہوتا۔گزشتہ دورے میں ہم اپنے فاسٹ بولروں کی مدد سے سری لنکائی بیٹنگ کو قابو کرنے میں کامیاب ہو گئے تھے لیکن اس مرتبہ ایسا نہ ہو سکا۔ ہر دورے اور سیریزکی طرح ہمیں اس سیریز سے بھی بہت سی غلطیوں اور خامیوں کا علم ہوا ہے جن سے جان چھڑانے کی ہر ممکن کوشش کی جائے گی۔
