لندن۔26 ڈسمبر (سیاست ڈاٹ کام ) انگلش پریمیئر لیگ میں ٹوٹنہم کی بڑی فتح نے خطاب کے حصول کے لئے اس کی کوشش کو نئی جلا بخشی ہے اور وہ لیور پول اور مانچسٹر سٹی کے ساتھ چیمپیئن بننے کی دوڑ میں شریک ہو گئی۔ ایورٹن کے خلاف میچ میں ٹوٹنہم نے2۔6گول کئے اور4گول کے بڑے فرق سے کامیابی سمیٹتے ہوئے پوائنٹس ٹیبل پر تیسرا مقام سنبھا لنے میں کامیاب ہو گئی۔ ایورٹن کی جانب کئے جانے والے گول والکوٹ اور سگرڈسن کے حصے میں آئے۔ والکوٹ نے 20 ویں منٹ میں ٹیم کو برتری دلائی جسے ٹوٹنہم کے کورین فٹبالر سون ہیونگ نے7منٹ کے بعد برابر کردیا۔ پہلا ہاف ختم ہونے سے پہلے ڈیلی ایلی اور ہیری کین نے مزید2گول کرکے ٹوٹنہم کو برتری دلا دی۔ دوسرے ہاف کے ابتدائی منٹوں میں ایرکسن نے ایک اورگول کر دیا ۔ سگرڈسن نے ایورٹن کے لئے خسارہ کم کیا لیکن ان کی دفاعی لائن ہیری کین اور ڈیلی ایلی کو نہیں روک پائی اور دونوں نے دوسرا اور ٹیم کا پانچواں اور چھٹا گول کرکے ایورٹن کی واپسی کا راستہ بند کردیا۔ میچ6-2 سے ٹوٹنہم کے حق میں ختم ہوا اور انگلش کلب اب 42 پوائنٹس کے ساتھ تیسرے نمبر پر پہنچ گیا جبکہ مانچسٹر سٹی 44 اور لیور پول 48 پوائنٹس کے ساتھ ابتدائی دونوں مقامات پر فائز ہیں۔
