لندن ۔12 ستمبر(سیاست ڈاٹ کام) انگلش فاسٹ بولر جیمز اینڈرسن نے آسٹریلیائی سابق فاسٹ بولر گلین میک گرا کا عالمی ریکارڈ توڑتے ہوئے ٹسٹ کرکٹ میں سب سے زیادہ وکٹیں لینے والے فاسٹ بولر بن گئے ہیں ۔ میک گرا 124 ٹسٹ میچوں میں 463 وکٹیں لے کر اب تک ٹسٹ کرکٹ میں سب سے زیادہ وکٹیں لینے والے فاسٹ بولر تھے تاہم اب جیمز اینڈرسن نے انہیں اس اعزاز سے محروم کردیا۔اینڈرسن نے 2003 میں لارڈز کے مقام پر زمبابوے کے خلاف ٹسٹ کا آغاز کیا اور اسی میچ میں مارک ورمیلن کو آؤٹ کر کے اپنی پہلی ٹسٹ وکٹ حاصل کی۔اس کے بعد 100وکٹوں کا سنگ میل عبور کرنے میں مزید 5 سال لگ گئے اور اس وقت کوئی بھی یہ نہیںکہہ سکتا تھا کہ یہ نوجوان ٹسٹ کرکٹ کی تاریخ کا کامیاب ترین فاسٹ بولر بن جائے گا لیکن اس کے بعد اینڈرسن نے ہر گزرتے دن کے ساتھ شاندار کھیل پیش کرنا شروع کردیا اور محض دو سال میں 200 وکٹوں کے سنگل میل کو بھی عبور کر لیا۔اس کے دو سال بعد انہوں نے 300 وکٹیں حاصل کیں اور پھر انٹیگا میں ویسٹ انڈیز کے دنیش رامدین کو آؤٹ کر کے انگلینڈ کے کامیاب ترین ٹسٹ بولر بن گئے۔اس سے قبل یہ ریکارڈ بوتھم کے پاس تھا جنہوں نے383 وکٹیں حاصل کی تھیں۔اینڈرسن نے لارڈز کے تاریخی میدان پر500 وکٹوں لینے کا ریکارڈ اپنے نام کیا اور تاریخ کے کامیاب ترین ٹسٹ بولر بننے کا امکانات مزید روشن کرلیے۔جب ہندوستان کے خلاف ٹسٹ سیریز کا آغاز ہوا تو یہ امکان ظاہر کیا جا رہا تھا کہ اینڈرسن اس سیریز کے دوران یہ ریکارڈ توڑ دیں گے اور انہوں نے ابتدائی تین ٹسٹ میچوں میں 17وکٹیں لے کر اس بات کو یقینی بنادیا۔لیکن سیریز کے چوتھے ٹیسٹ میچ میں مایوس کن کارکردگی کے سبب ایک مرتبہ پھر ایسا محسوس ہونے لگا کہ شاید انہیں یہ ریکارڈ توڑنے کے لیے مزید انتظار کرنا پڑے۔ سیریز کے آخری ٹسٹ میچ میں انہوں نے مجموعی طور پر 5 وکٹیں حاصل کر کے یہ عالمی ریکارڈ اپنے نام کر لیا۔ انہوں نے میچ کی آخری اننگز میں محمد سمیع کو آؤٹ کر کے یہ عالمی ریکارڈ قائم کیا۔ ٹسٹ کرکٹ میں سب سے زیادہ وکٹیں لینے والے بولروں کی فہرست میں اینڈرسن کا چوتھا نمبر ہے جہاں ان سے پہلے تینوں نام اسپنرز کے ہیں۔سب سے زیادہ 800 وکٹیں لینے کا عالمی ریکارڈ سری لنکائی اسپنر متھیا مرلی دھرن کے پاس ہے جبکہ اس فہرست میں دوسرا اور تیسرا نمبر آسٹریلیا کے شین وارن اور ہندوستان کے انیل کمبلے کے پاس ہے جنہوں نے بالترتیب 708 اور 618 وکٹیں حاصل کیں۔
