لندن ۔13 اگسٹ (سیاست ڈاٹ کام)انگلینڈ کے تجربہ کارفاسٹ بولرجیمز اینڈرسن نے ہندوستان کے خلاف دوسرے ٹسٹ کی دوسری اننگز میں 4 وکٹیں حاصل کرکے ایک ہی میدان میں 100 وکٹیں حاصل کرنے والے دوسرے اور لارڈز میں یہ کارنامہ انجام دینے والے پہلے بولر بن گئے ہیں۔جیمز اینڈرسن نے لارڈز میں ہندوستان کے خلاف کھیلے گئے میچ میں اوپنر مرلی وجے اورلوکیش راہول کو آوٹ کر کے لارڈز کرکٹ گراونڈ میں اپنی 100 وکٹیں مکمل کی جو اس گراونڈ میں کسی بھی بولرکا ریکارڈ ہے۔انھوں نے اس ریکارڈ کے لیے 23 میچوں کی 45 اننگز کھیلیں۔لارڈز میں سب سے زیادہ وکٹیں لینے والے بولروں میں دوسرے نمبر پر انگلینڈ کے ہی کرس براڈ ہیں جنھوں نے 21 میچوں کی 42 اننگز میں 83 وکٹیں حاصل کر رکھی ہیں۔تیسرے نمبر پر انگلینڈ کے سابق آل راؤنڈر ایان بوتھم ہیں جو15میچوںکی 26 اننگز میں 69 وکٹیں حاصل کرپائے تھے۔اس سے قبل سری لنکا کے سابق عظیم اسپنر متھیا مرلی دھرن واحد بولر تھے جنھوں نے 3 مختلف میدان میں 100یا 100 سے زائد وکٹیں حاصل کرنے کا ریکارڈ بنایا ہے۔مرلی دھرن نے کولمبو کے میدان میں 166، کینڈی کے اسٹیڈیم میں 117 اور گال انٹرنیشنل اسٹیڈیم میں 111 وکٹیں حاصل کرکے تین میدانوں میں 100 سے زائد وکٹیں لینے کا ریکارڈ بنایا ہے۔سری لنکا کے ہی رنگنا ہیراتھ بھی ایک میدان میں 100 وکٹیں مکمل کرنے کا ریکارڈ بنانے کے قریب ہیں، انھوں نے گال انٹرنیشنل اسٹیڈیم میں 99 وکٹیں حاصل کی ہیں اور اس اعزاز کے لیے انھیں صرف ایک وکٹ درکار ہے۔خیال رہے کہ انگلینڈ نے لارڈ ٹسٹ میں ہندوستان کو ایک اننگز اور159 رنز سے شکست دے کر5 میچوںکی سیریز میں 2۔0 کی برتری حاصل کرلی ہے۔
