کراچی ، 23 اپریل (سیاست ڈاٹ کام) صدر پاکستان اسنوکر اینڈ بلیئرڈ فیڈریشن عالمگیر شیخ نے کہا کہ ٹیم میں شامل کھلاڑی ابھی نئے ہیں لیکن ان سے اچھے کھیل کی توقع ہے۔ 30 ویں ایشین اسنوکر چمپئن شپ میں حصہ لینے والی پاکستانی ٹیم ٹورنمنٹ میں اپنی بھرپور صلاحیتوں کا مظاہرہ کرنے کیلئے پرعزم ہے۔ عالمگیر شیخ نے کہا کہ اس ٹورنمنٹ میں صف اول کے پاکستانی کھلاڑی شریک نہیں لیکن نوجوان اور کم تجربہ رکھنے والے کھلاڑیوں نے بھی خوب محنت کی ہے۔ آج ایک بیرونی نیوز ویب سائٹ سے گفتگو میں انھوں نے کہا کہ یہ کوئی مضبوط ٹیم نہیں کیونکہ ہمارے ٹاپ رینکنگ کھلاڑی آصف اور سجاد دونوں ہی چمپئن شپ سے باہر ہوگئے تھے تو وہ اس ٹورنمنٹ کیلئے کوالیفائی نہ کرسکے۔ موجودہ (نوجوان) لڑکوں کو بہت زیادہ تجربہ نہیں ہے لیکن ان سے کافی امیدیں وابستہ ہیں۔
ایشین اسنوکر چمپئن شپ 26 اپریل سے 3 مئی تک متحدہ عرب امارات میں ہورہی ہے۔ ٹورنمنٹ کی تیاری کیلئے پاکستانی کھلاڑیوں کا تربیتی کیمپ کراچی میں لگایا گیا ہے جو کہ جمعرات تک جاری رہے گا اور ٹیم 26 اپریل کو یو اے ای روانہ ہوگی۔ پاکستان اسنوکر ٹیم تین کھلاڑیوں محمد آصف ٹوبا، حمزہ آبر اور اسجد اقبال پر مشتمل ہے جبکہ حاجی عبدالرشید منیجر کے فرائض انجام دیں گے۔ ٹورنمنٹ میں حصہ لینے والے دیگر قابل ذکر ممالک میں ہندوستان، افغانستان، تھائی لینڈ، ایران، عراق، چین، ہانگ کانگ، قطر، متحدہ عرب امارات، سنگاپور، منگولیا، جنوبی کوریا، سری لنکا اور شام شامل ہیں۔ عالمگیر شیخ نے کہا کہ ایران، افغانستان، ہندوستان، تھائی لینڈ اور چین ایشیا کی بہت مضبوط ٹیمیں ہیں اور ان سے سخت مقابلے کی توقع ہے۔