دبئی۔10 ستمبر(سیاست ڈاٹ کام) ایشیا کرکٹ کپ کیلئے مختلف ٹیموں کی ٹریننگ کا آغاز پیر سے دبئی اسپورٹس سٹی میں قائم آئی سی سی اکیڈمی میں ہوا۔ہندوستان کی ٹیم انگلینڈ میں ٹسٹ سیریز کے بعددبئی پہنچے گی اور وہ ایونٹ میں پہنچنے والی آخری ٹیم ہو گی۔ روہت شرما کی قیادت میں ہندوستانی کرکٹ ٹیم کو خصوصی پروٹوکول دیا جائے گا۔ ہندوستانی کرکٹ بورڈ ایشیا کپ کا میزبان ہونے کے ناتے اپنی ٹیم کو زیادہ اہمیت دے رہا ہے۔ منتظمین کی جانب سے کہاگیا ہے کہ ہندوستانی کرکٹ ٹیم الگ ہوٹل میں قیام کرے گی جبکہ دیگر 5 ٹیموں کو ایک ہی ہوٹل میں ٹھہرانے کا فیصلہ کیا گیاہے۔ 2014 ء میں سری لنکا نے ایشیا کپ جیتا تھا تب ٹیم کی قیادت انجیلو میتھیوز کے پاس تھی جو اس وقت بھی ٹیم کے قائد اور ایک مرتبہ پھر ٹرافی وطن واپس لے جانے کیلئے پراعتماد ہیں۔ انھوں نے کہاکہ ہماری ٹیم نوجوان اور سینئر کھلاڑیوں سے مزین ہے۔ مجھے اس ایونٹ کیلئے بہترین اسکواڈ ملا، ہمارے پاس کسی بھی ٹیم کو شکست دینے کی صلاحیت ہے۔ ایونٹ میں کوالیفائر کی جگہ پر ہانگ کانگ نے قبضہ کیا ہے جس نے یو اے ای کو فائنل میں شکست دی تھی۔اس کے کپتان انوشمان راٹھ ایشیائی ایونٹ میں جگہ بنانے اور ہند وپاک کے ساتھ گروپ اے میں مقابلے کا موقع پانے پرکافی خوش ہیں۔انھیں اس بات کی بھی خوشی ہے کہ وہ کوالالمپور میں کھیلے گئے ایشین کپ کوالیفائرز کے فائنل میں یو اے ای کو شکست دینے میں کامیاب رہے۔ہانگ کانگ ایشیا کپ کے اپنے گروپ میں پہلا میچ 16ستمبر کو پاکستان سے کھیلے گا۔ ہندوستانی ٹیم 18ستمبر کو ہانگ کانگ اور19ستمبر کو پاکستان کے خلاف کھیلے گی۔ ٹورنمنٹ کے کمنٹری پینل میں پاکستان کے 2سابق کپتانوں رمیز راجہ اور عامر سہیل کو شامل کیا ہے دیگر کمنٹیٹرز میں سنیل گواسکر،لکشمن، شیوا راما کرشنن،ڈین جونز،کمارا سنگا کارا،رسل آرنلڈ،ا ظہر علی خان،کیون پیٹرسن اوربریٹ لی شامل ہیں۔
