میلبورن ۔26 ڈسمبر(سیاست ڈاٹ کام) مینک اگروال 76 رنز کی شاندار نصف سنچری کے بعد چتیشور پجارا اور کپتان ویراٹ کوہلی کے درمیان تیسری وکٹ کے لئے92 رنز کی ناٹ آوٹ شراکت کی بدولت ہندوستان نے آسٹریلیا کے خلاف آج تیسرے باکسنگ ڈے ٹسٹ کے پہلے دن کھیل کے اختتامتک دو وکٹ کے نقصان پر215 رنز بنا لئے ہیں۔ ہندوستان نے یہاں میلبورن کرکٹ گراونڈ (ایم سی جی) میدان پر ٹاس جیتنے کے بعد پہلے بیٹنگ کرنے کا فیصلہ کیا اور اپنی پہلی اننگز میں دن کے اختتام تک 89 اوور میں دو وکٹ کے نقصان پر 215 رنز بنائے ۔ مینک نے76 رنز بنائے جبکہ پجارا68 رنز اور کوہلی47 رنز بناکر وکٹ پر موجود ہیں جبکہ ہندوستان کے آٹھ وکٹ باقی ہیں۔آسٹریلیا کے لئے فاسٹ بولرپیٹ کمنس نے19 اوور میں40 رنز پر دووکٹ حاصل کئے جبکہ دیگر کوئی بولر کامیاب نہیں ہوسکا ۔ ہندوستانی ٹیم چار میچوں کی سیریز میں گزشتہ میچ ہار کر1۔1 سے برابری پر آگئی تھی اور اس مرتبہ ٹیم نے لوکیش راہول اور مرلی وجے کی تجربہ کار جوڑی کے بجائے ہنوما وہاری اور مینک کی نئی اوپننگ جوڑی کو موقع دیا جنہوں نے پہلے وکٹ کے لئے40 رنز جوڑے ۔ ہندوستان پرتھ میں 146رن سے ہارنے کے بعد سیریز میں برابری پر آگیا تھا۔ مڈل آرڈر کے بیٹسمین ہنوما فارم میں نظر نہیں آئے اور انہوں نے66 گیندوں کا سامنا کرتے ہوئے صرف8 رنز جوڑے ۔ انہیں پیٹ کمنس نے آرون فنچ کے ہاتھوں کیچ آوٹ کرواکر19 ویں اوور میں ہندوستان کا پہلا وکٹ حاصل کیا۔ اپنا پہلا میچ کھیلنے والے مینک اگروال نے اس ساجھیداری کے ٹوٹنے کے بعدمحتاط انداز میں کھیلتے ہوئے پجارا کے ساتھ دوسری وکٹ کے لئے 83 رنز جوڑے ۔ مینک نے161 گیندوں کا سامنا کرتے ہوئے آٹھ چوکے اور ایک چھکے کی مدد سے76 رنز بنائے ۔کرناٹک کے27 سالہ بیٹسمین طویل عرصے سے ٹسٹ ٹیم میں جگہ بنانے کا انتظار کررہے تھے اور انہوں نے باکسنگ ڈے ٹسٹ میں ملے اس موقع کا شانداراور بھرپور فائدہ اٹھاتے ہوئے ٹسٹ کیریر کی پہلی نصف سنچری95 گیندوں میں مکمل کی ۔کمنس نے55 ویں اوور میں چائے کے وقفے سے قبل کپتان ٹیم پین کے ہاتھوں مینک کو کیچ آوٹ کرواکر ہندوستان کا دوسرا اہم وکٹ حاصل کیا۔ ہندوستان نے چائے کے وقفے تک 123 کے اسکور پر دو وکٹ گنوائے ۔مینک نے اس اسکور کے ساتھ ہی آسٹریلیا میں پہلے میچ میں سب سے زیادہ اسکور بنانے والے ہندوستان بیٹسمین بننے کا ریکارڈ اپنے نام کرلیا۔ اس سے پہلے دسمبر1947 میں دتو فڈکر نے51 رنز کے ساتھ یہ ریکارڈ اپنے نام کیا تھا۔
