اڈیلیڈ ۔11 ڈسمبر (سیاست ڈاٹ کام )آسٹریلیا اور ہندوستان کے کھلاڑیوں نے پہلے ٹسٹ میچ میں زیادہ کیچز پکڑ کر نیا عالمی ریکارڈ قائم کر دیا اور میچ میں مجموعی طور پر 35 کیچز پکڑے۔ سیریز کے پہلے ٹسٹ میچ میں آسٹریلیا کے کھلاڑیوں نے 18 جبکہ ہندوستانی کھلاڑیوں نے 17 کیچز تھام کر حریف کھلاڑیوں کو پویلین کی راہ دکھائی۔ اتفاق کی بات یہ ہے کہ پہلے ٹسٹ کی دوسری اننگز میں دونوں ٹیموں کے تمام کھلاڑی کیچ آؤٹ ہوئے۔ اس سے قبل ٹسٹ کرکٹ کی تاریخ میں ایک میچ میں زیادہ کیچز کا عالمی ریکارڈ آسٹریلیا اور جنوبی افریقی کھلاڑیوں کے پاس تھا جہاں دونوں ٹیموں کے کھلاڑیوں نے رواں سال کیپ ٹاؤن ٹسٹ میں 34 کیچز تھام کر ورلڈ ریکارڈ پر قبضہ جمایا تھا۔ ہندوستانی وکٹ کیپر رشبھ پنت نے ٹسٹ کرکٹ کی تاریخ میں ایک میچ میں وکٹوں کے پیچھے زیادہ شکارز کا جیک رسل اور اے بی ڈی ویلیئرز کا عالمی ریکارڈ برابر کر دیا۔ پنت نے آسٹریلیا کیخلاف کھیلے گئے پہلے ٹسٹ میچ میں وکٹوں کے پیچھے 11 کھلاڑیوں کو شکار بنا کر یہ کارنامہ انجام دیا اور وکٹوں کے پیچھے زیادہ شکار کا عالمی ریکارڈ برابر کردیا، جو اس سے قبل جیک رسل اور اے بی ڈی ویلیئرز کے پاس ہے۔انگلش وکٹ کیپر جیک رسل نے 1995 میں جنوبی افریقہ کے خلاف اور ڈی ویلیئرز نے2013 میں پاکستان کے خلاف میچ میں وکٹوں کے پیچھے 11 شکار کر کے عالمی ریکارڈ پر قبضہ جمایا تھا۔ پنت عالمی ریکارڈ تو نہ توڑ سکے لیکن وہ ایک میچ میں وکٹوں کے پیچھے زیادہ شکار کرنے والے ہندوستانی وکٹ کیپر بھی بن گئے۔ انہوں نے دھونی اور وردھیمان ساہا کا ریکارڈ توڑ کر یہ سنگ میل عبور کیا جہاں دھونی نے 9 اور ساہا نے 10 کیچز پکڑے تھے۔ آسٹریلیا کے خلاف پہلے ٹسٹ میچ میں فتح کے ساتھ ساتھ ہندوستانی ٹیم کے کپتان اور ویراٹ کوہلی نے ٹسٹ کرکٹ کی تاریخ میں ایک اور اعزاز اپنے نام کر لیا اور 20 مرتبہ ٹاس جیتنے کے بعد اب تک ان تمام میچز میں ناقابل شکست رہے۔ کوہلی نے ہندوستانی ٹسٹ ٹیم کی قیادت سنبھالنے کے بعد جب بھی ٹاس جیتا تو ان کی ٹیم شکست سے محفوظ رہی۔کوہلی نے اب تک مجموعی طور پر 20 میچز میں ٹاس جیتا جن میں سے 17 میچز میں ہندوستانی ٹیم نے فتوحات حاصل کیں جبکہ تین میچز ڈرا ہوئے۔ کوہلی دنیا کے پہلے کپتان ہیں جنہیں ٹاس جیتنے کے بعد شکست کا سامنا نہیں کرنا پڑا، سابق آسٹریلین کپتان ڈان بریڈمین اس فہرست میں دوسرے نمبر پر ہیں۔بریڈ مین نے 10 مرتبہ ٹاس جیتا جن میں سے آسٹریلیائی ٹیم 9 میچز میں کامیاب رہی جبکہ ایک میچ ڈرا ہوا۔
