اکثریت لارڈ رام کی پرستار :آر ایس ایس سربراہ موہن بھاگوت
ہردوار 2 اکٹوبر ( سیاست ڈاٹ کام ) آر ایس ایس کے سربراہ موہن بھاگوت نے کہا ہے کہ خود اپوزیشن جماعتیں بھی کھلے عام ایودھیا میں رام مندر کی مخالفت نہیںکرسکتیں کیونکہ ملک کی اکثریت لارڈ رام کی پرستش کرتی ہے ۔ پتانجلی یوگ پیٹھ میں ایک تقریب سے خطاب کرتے ہوئے بھاگوت نے کہا کہ آر ایس ایس اور بی جے پی ایودھیا میںرام مندر کی تعمیر کے عہد کے پابند ہیں تاہم کچھ کاموں میں وقت لگتا ہے ۔ انہوں نے کہا کہ یہ بات اہمیت کی حامل ہے کہ مسند اقتدار پر کون فائز ہے اور جو حکومت اچھے کام کر رہی ہو اسے برقرار رہنا چاہئے ۔ انہوں نے کہا کہ ہر حکومت کی مجبوریاں ہوتی ہیں اور اسے مجبوریوں کو دیکھتے ہوئے کام کرنا ہوتا ہے ۔ تاہم سادھو اورسنتوں کا جہاں تک تعلق ہے وہ ان حدود سے باہر ہیں اور انہیں چاہئے کہ وہ مذہب ‘ ملک اور سماج کی بہتری اور فلاح کیلئے کام کریں۔ بھاگوت نے کہا کہ ملک کی اپوزیشن جماعتیں کھلے عام رام مندر کی مخالفت نہیں کرسکتیں کیونکہ وہ جانتی ہیں کہ ملک کی اکثریت لارڈ رام کی پرستش کرتی ہے ۔ تاہم کچھ کاموں کیلئے وقت درکار ہوتا ہے ۔ انہوں نے کہا کہ ہر حکومت کی اپنی مجبوریاں ہوتی ہیں اور جو حکومت اچھے کام کرے اسے اقتدار پر برقرار رہنا چاہئے ۔
