ریسیف (برازیل ) 21جون ( سیاست ڈاٹ کام )برازیل میں جاری 20ویں فٹبال ورلڈکپ میں گروپ ڈی کے اہم میچ میں کوسٹاریکا نے اٹلی کو1-0سے شکست دیکر نہ صرف دنیائے فٹبال کو حیران کردیا بلکہ ٹورنمنٹ کے تمام اندازوں کو غلط ثابت کردیا ہے۔کوسٹاریکا ’گروپ آف ڈیتھ‘ کے نام سے معروف ورلڈ کپ کے اس سب سے مشکل گروپ کی سب سے ناتجربہ کار ٹیم ہے لیکن اس نے سب اندازوں کو غلط ثابت کرتے ہوئے سب سے پہلے دوسرے مرحلے میں جگہ بنائی ہے۔اس نے اپنے پہلے میچ میں یوروگوائے کو3-1 گول سے شکست دی تھی۔اٹلی کی اس شکست کا مطلب انگلینڈ کا ورلڈکپ سے اخراج بھی ہے۔ برازیل کے شہر رسیف کے پرنامبوکو اسٹیڈیم میںمنعقدہ میچ میں کوسٹاریکا نے آغاز سے ہی عمدہ کھیل کا مظاہرہ کیا اور اطالوی گول پر شروع میں ہی کئی حملے کئے۔کوسٹاریکا کے کھلاڑیوں کے کھیل سے لگ رہا تھا کہ وہ اٹلی کی تجربہ کار ٹیم سے بالکل مرعوب نہیں اور ان کے بیخوفی اور تیز رفتاری نے اطالوی کھلاڑیوں کو پریشان کردیا۔وسطی امریکہ سے تعلق رکھنے والی اس ٹیم کو اپنے جوش اور بیخوفی کا صلہ پہلے ہاف کے اختتام سے کچھ لمحے قبل اس وقت ملا جب 44 ویں منٹ میں برائن روئز نے گول کر کے کوسٹاریکا کو اٹلی پر برتری دلوا دی۔
مقابلہ کے ایک اہم پہلو کوسٹاریکا کے دفاعی کھلاڑی اطالوی ا سٹرائیکرس خصوصاً بالاٹیلی کے سامنے ڈٹے رہے۔اٹلی کے تجربہ کار کیپر بوفون روئز کا ہیڈر روکنے میں ناکام رہے اور اس گول کا فیصلہ گول لائن ٹیکنالوجی کی مدد سے کیا گیا۔میچ کا پہلا ہاف کوسٹاریکا کی برتری پر ہی ختم ہوا اور اس برتری نے اٹلی کی امیدوں پر پانی پھیرنا شروع کیا۔دوسرے ہاف میں کوسٹاریکا نے ابتدا میں تو تیز کھیل دکھایا لیکن پھر اپنی توجہ برتری کے دفاع پر مرکوز کر لی اور اطالوی کھلاڑیوں خصوصاً اسٹرائیکر بالاٹیلی کے سامنے ڈٹ گئے۔اس ہاف میں اٹلی کو گول کرنے کے چند مواقع ملے لیکن وہ اس سے فائدہ نہ اٹھا سکی۔اٹلی کی ٹیم اس میچ میں مجموعی طور پر وہ کارکردگی نہ دکھا سکی جس کا مظاہرہ اس نے انگلینڈ کے خلاف کیا تھا۔اس کا ثبوت اطالوی مڈفیلڈر پرلو کے پہلے ہاف میں 35 پاس تھے جبکہ انگلینڈ کے خلاف پہلے ہاف میں ان کے پاسز کی تعداد اس سے دوگنی تھی۔یہ کسی بھی ورلڈ کپ میں ان دونوں ٹیموں کا پہلا مقابلہ تھا۔ کوسٹاریکا کی ٹیم اس وقت فٹبال کی عالمی درجہ بندی میں 28 ویں جبکہ اٹلی نویں مقام پر ہے۔اس فتح کے بعد کوسٹاریکا دو میچوں میں چھ پوائنٹس کے ساتھ گروپ ڈی میں سرفہرست مقام حاصل کرلیا ۔