لاہور ، 10مئی (سیاست ڈاٹ کام) پاکستانی کرکٹ ٹیم کے آل راؤنڈر شعیب ملک 2020 کے ٹی ٹوئنٹی ورلڈ کپ تک کرکٹ کھیلنے کی خواہش رکھتے ہیں تاہم 36 سالہ کھلاڑی جانتے ہیں کہ اس مقصد کے حصول کیلئے ان کا مسلسل پرفارم کرنا لازمی ہے ۔ پاکستانی کرکٹ ٹیم کے سابق کپتان شعیب ملک نے ٹسٹ کرکٹ سے پانچ سال کی دوری کے بعد ایک بار پھر ٹسٹ کرکٹ کا رخ کیا تھا تاہم تین سیریز کھیلنے کے بعد انہوں نے 2015 کے اواخر میں ٹسٹ کرکٹ سے ریٹائرمنٹ کا اعلان کر دیا تھا۔ لیکن وہ اب بھی محدود اوورز کی مختلف سیریز میں پاکستانی ٹیم کے رکن کی حیثیت سے کھیلتے رہتے ہیں۔ پاکستانی آل راونڈر کا کہنا ہے کہ 2019 میں ہونے والا 50 اوورز پر مشتمل ورلڈ کپ میرا آخری ورلڈ کپ ہو گا تاہم میں 2020 میں ہونے والا ٹی ٹوئنٹی ورلڈ کپ کھیلنا چاہتا ہوں۔ یہ میرے دو بڑے مقاصد ہیں جن پر میری نظر ہے ۔ دیکھیں کہ آگے کیا ہوتا ہے ۔ اگر میں مسلسل پرفارم کرتا رہا تو ان دو عالمی کپ کیلئے کھیلنا چاہوں گا۔ پاکستانی کرکٹ ٹیم کے مڈل آرڈر بلے باز اور آف اسپن بالر شعیب ملک اب تک پاکستان کیلئے 35 ٹسٹ میچ کھیل چکے ہیں جبکہ 261 ون ڈے انٹرنیشنل میچوں میں بھی پاکستان کی نمائندگی کر چکے ہیں۔ ساتھ ہی اب تک وہ 95 ٹی ٹوئنٹی میچوں میں بھی اپنی کار کردگی کا مظاہرہ کر چکے ہیں۔ پاکستانی کرکٹر شعیب ملک گزشتہ پانچ برسوں سے کریبیئن پریمیئر لیگ میں بارباڈوس ٹرائیڈنیٹس کی جانب سے کھیلتے آ رہے تھے تاہم اس برس وہ ٹورنامنٹ میں شامل ایک اور ٹیم،گونیا ایمیزن واریئرز کا حصہ ہیں۔ یہ لیگ 8 اگست سے 16 ستمبر تک کھیلی جائے گی۔ خیال رہے کہ شعیب ملک نے 3 نومبر 2015 کو شارجہ میں انگلینڈ کے خلاف سیریز کے دوران ہی ٹسٹ کرکٹ سے کنارہ کشی کا اعلان کردیا تھا۔انھوں نے ٹسٹ کرکٹ سے ریٹائرمنٹ کا اعلان کرتے ہوئے کہا تھا کہ میرے لیے میری فیملی سب سے پہلے ہے اور میری نظریں ورلڈ کپ 2019 پر مرکوز ہیں۔ شعیب ملک نے 34 ٹسٹ میچوں میں پاکستان کی نمائندگی کرتے ہوئے تین سنچریوں اور آٹھ نصف سنچریوں کی مدد سے ایک ہزار 860 رنز بنائے اور 25 کھلاڑیوں کو اپنی اسپن بالنگ کا نشانہ بنایا۔شعیب ملک نے اپنے کیرئر کا آغاز 14 اکتوبر 1999 کو ویسٹ انڈیز کے خلاف ایک روزہ میچ سے کیا اور اب تک 252 میچ کھیلے ہیں۔ انھوں نے اب تک ایک روزہ کیریئر میں 9 سنچریوں اور 39 نصف سنچریوں کی مدد سے 6 ہزار 765 رنز اور 153 وکٹیں حاص کی ہیں۔شعیب ملک نے 28 اگست 2006 کو انگلینڈ کے خلاف ٹی ٹوئنٹی کیریئر شروع کیا اور اب تک 89 میچوں میں ایک ہزار 753 رنز اور 25 وکٹیں حاصل کر چکے ہیں۔
