دبئی ۔20 جون(سیاست ڈاٹ کام)انٹرنیشنل کرکٹ کونسل(آئی سی سی) نے ٹی20 میچ برابری پر ختم ہونے کے باوجود سوپر اوور کے ذریعے مقابلے کا فیصلہ نہ کرنے پر آئرلینڈ اور اسکاٹ لینڈ کی ٹیموں سے معافی مانگ لی۔نیدرلینڈز میں جاری سہ ملکی سیریز میں اسکاٹ لینڈ نے آئرلینڈ کو 186 رنز کا ہدف دیا لیکن آئرلینڈ کی ٹیم آخری گیند پر درکار 3 رنز کے بجائے صرف دو رنز ہی بنا سکی اور دونوں ٹیموں کے درمیان مقابلہ ٹائی ہو گیا۔تاہم اسٹیڈیم میں اس وقت حیران کن مناظر دیکھنے کو ملے جب سوپر اوور کے بجائے دونوں ٹیموں کے کھلاڑی آپس میں ہاتھ ملا کر پویلین لوٹ گئے اور میچ میں ٹائی قرار دے کر ختم کردیا گیا۔آئی سی سی نے مذکورہ واقعہ پر برہمی کا اظہار کرتے ہوئے کہا ہے کہ ٹی20 کرکٹ کے قواعد کے تحت میچ کا فیصلہ ہونا چاہئے تھا۔آئی سی سی کے ترجمان نے کہا کہ میچ عہدیدار قوانین کو سمجھ نہیں سکے جس کی وجہ سے انہوں نے ٹائی میچ میں سوپر اوور نہیں کروایا، یہ ایک بڑی ناکامی ہے جس کے لیے آئی سی سی اسکاٹ لینڈ اور آئرلینڈ سے معذرت خواہ ہے۔ ہم نے عہدیداروں کے سامنے اس معاملے کو اٹھایا اور کوشش کریں گے کہ مستقبل میں اس طرح کا واقعہ پیش نہ آئے۔دوسری جانب اسکاٹ لینڈ اور آئرلینڈ دونوں ہی ٹیموں کے نمائندوں نے کہا کہ ہمیں سہ ملکی ٹورنمنٹ کے آغاز میں ہی بتا دیا گیا تھا کہ میچ ٹائی ہونے کی صورت میں سوپر اوور کا انعقاد نہیں کیا جائے گا۔
