لندن۔4 جون(سیاست ڈاٹ کام) پاکستان کرکٹ بورڈ (پی سی بی) کی سلیکشن کمیٹی نے اسکاٹ لینڈ سے 2 میچوں پر مشتمل ٹوئنٹی20 سیریز کے لئے 15 رکنی ٹیم کا اعلان کردیا۔چیف سلیکٹر نے ویسٹ انڈیز کے خلاف ہوم سیریز کھیلنے والے اسکواڈ کو برقرار رکھا ہے جبکہ زخمی ہونے والے نوجوان بیٹسمین بابر اعظم کی جگہ بائیں ہاتھ کے بیٹسمین حارث سہیل کو شامل کرلیا گیا۔پاکستان ٹیم میں سرفراز احمد (کپتان)، فخر زمان، حارث سہیل، شعیب ملک، آصف علی، حسین طلعت، فہیم اشرف، شاداب خان، محمد نواز، محمد عامر، حسن علی، راحت علی، عثمان شنواری اور شاہین شاہ آفریدی شامل ہیں۔واضح رہے کہ پاکستان اور اسکاٹ لینڈ کے مابین 2 ٹی ٹوئنٹی پر مشتمل سیریز کا پہلا میچ 12 جون جبکہ دوسرا میچ 13 جون کو کھیلا جائے گا۔ اس وقت پاکستان ٹیم دورہ آئرلینڈ، انگلینڈ اور اسکاٹ لینڈ کے لیے برطانیہ میں موجود ہے۔پاکستان نے امام الحق کی ذمے دارانہ بیٹنگ کی بدولت آئرلینڈ کو ان کی تاریخ کے پہلے ٹسٹ میچ میں 5 وکٹوں سے شکست دے دی۔ پاکستان نے 16سال بعد کسی ٹیم کو فالو آن کروایا۔بعدِ ازاں پاکستان نے انگلینڈ کا دورہ کیا جہاں انہوں نے میزبان ٹیم کے خلاف 2 ٹسٹ میچوں پر مشتمل سیریز کھیلی جو 1-1 سے برابر رہی۔پاکستان نے لارڈز ٹسٹ میچ میں انگلینڈ کو شاندار بولنگ اور بیٹنگ کی بدولت چاروں شانے چت کرتے ہوئے 9 وکٹوں سے شکست دی۔دوسرے میچ لیڈز کے مقام پر کھیلا گیا جہاں ابتدا سے ہی پاکستان ٹیم میزبان انگلینڈ کے بولز کے دباؤ میں نظر آئی۔انگلش بولروں نے وکٹکا فائدہ اٹھاتے ہوئے مہمان ٹیم کو پہلی اننگز میں 174 رنز پر آؤٹ کردیا، جبکہ اپنی پہلی اننگز میں 363 رنز اسکور کرکے 189 رنز کی برتری بھی حاصل کی۔پاکستان ٹیم دوسری اننگز کا آغاز کیا تو اس کی وکٹیں تاش کے پتوں کی طرح گرتی رہی اور پوری ٹیم 134 رنز پر آؤٹ ہوگئی۔انگلینڈ نے دوسرا ٹسٹ اننگز اور 54 رنز سے
جیت لیا۔
