ساؤپالو۔19 اپریل(سیاست ڈاٹ کام)اسٹار برازیلین فٹ بالر نیمر نے رواں برس روس میں منعقد شدنی ورلڈ کپ فٹ بال ٹورنمنٹ سے قبل صد فیصد فٹ ہونے کی امید ظاہر کرتے ہوئے کہا ہے کہ وہ 17 مئی سے دوبارہ ٹریننگ شروع کریں گے۔نیمر رواں سال 25 فروری کو لیگ میچ کے دوران پیر کی تکلیف کا شکار ہوئے تھے جس کی وجہ سے انہیں سرجری کروانی پڑی تھی اور ان دنوں وہ بحالی صحت کے عمل سے گزر رہے ہیں۔زخموں کے مسائل کے باعث نیمر کی ورلڈ کپ میں شرکت تاحال غیریقینی صورتحال کا شکار ہے جہاں برازیلیائی ٹیم میگا ایونٹ میں 17 جون کو سوئٹزرلینڈ کے خلاف میچ سے عالمی خطاب کے لیے اپنی مہم کا آغاز کرے گی۔ساؤ پالو میں پریس کانفرنس سے خطاب کرتے ہوئے انہوں نے کہا کہ وہ تیزی سے صحت یاب ہو رہے ہیں اور 17 مئی کو ان کا آخری معائنہ ہو گا جس کے بعد وہ کھیلنے کے لئے آزاد ہوں گے۔نیمر نے ورلڈ کپ کو خواب قرار دیتے ہوئے ازراہ مذاق کہا کہ میں گھر میں بیٹھ کر ٹی وی پر ورلڈ کپ نہیں دیکھنا چاہتا۔انہوں نے کہا کہ میں گزشتہ 4 برس سے ورلڈ کپ کا انتظار کر رہا ہوں اور اس میں شرکت کے لئے ہر ممکن کوشش کروں گا۔
