لارڈز 23 مئی (سیاست ڈاٹ کام ) لارڈز میں انگلینڈ کے خلاف پہلے کرکٹ ٹیسٹ میچ کے دوسرے دن نیوزی لینڈ نے کھیل کے اختتام پر دو وکٹوں کے نقصان پر 303 رنز بنا لیے ہیں۔ نیوزی لینڈ کو انگلینڈ کی برتری ختم کرنے کے لیے اب مزید 86 رنز کی ضرورت ہے اور اس کی آٹھ وکٹیں باقی ہیں۔انگلینڈ کی ٹیم نے اپنی پہلی اننگز میں 389 رنز بنائے تھے۔جمعہ کو میچ کے دوسرے دن نیوزی لینڈ کی جانب سے مارٹن گپٹل اور ٹام لیتھم نے اننگز کا آغاز کیا اور ذمہ دارانہ بیٹنگ کا مظاہرہ کرتے ہوئے پہلی وکٹ کے لیے 148 رنز بنائے۔ تاہم اس موقع پر پہلے گپتل اور پھر لیتھم یکے بعد دیگرے پویلین لوٹ گئے۔ گپتل 70 رنز بنانے کے بعد سٹوئرٹ براڈ کی وکٹ بنے جبکہ لیتھم کو معین علی نے 59 کے انفرادی سکور پر آؤٹ کیا۔دوہرے نقصان کے باوجود نیوزی لینڈ کی ٹیم دباؤ میں نہیں آئی اور کین ولیمسن اور راس ٹیلر نے تیسری وکٹ کے لیے مزید 155 رنز کی پارٹنر شپ قائم کر دی۔کین ولیمسن اور راس ٹیلر نے تیسری وکٹ کے لیے مزید 155 رنز کی پارٹنر شپ قائم کی جب دوسرے دن کا کھیل ختم ہوا تو ولیمسن 92 اور ٹیلر 47 رنز پر ناٹ آؤٹ تھے۔اس سے پہلے انگلینڈ کی پوری ٹیم اپنی پہلی اننگز میں 389 رنز بنا کر آؤٹ ہوگئی تھی۔ ٹاپ آرڈر کی ناکامی کے بعد انگلینڈ کی جانب سے جو روٹ نے 11 چوکوں کی مدد سے 98 اور بین سٹوکس نے 15 چوکوں اور ایک چھکے کی مدد سے 92 رنز بنائے۔ان کے علاوہ بٹلر اور معین علی نے بھی نصف سنچریاں بنا کر میزبان ٹیم کو بہتر سکور تک پہنچنے میں مدد دی۔نیوزی لینڈ کی جانب سے ٹرینٹ بولٹ اور میٹ ہنری نے چار چار کھلاڑیوں کو آؤٹ کیا۔جمعرات کو شروع ہونے والے اس میچ میں نیوزی لینڈ نے ٹاس جیت کر انگلینڈ کو پہلے بیٹنگ کرنے کی دعوت دی تھی۔
