انگلینڈ کو شکست،آسٹریلیا نے سہ رخی سیریز جیت لی

ممبئی۔31 مارچ (سیاست ڈاٹ کام )کپتان میننگ لئنگ کی16 چوکوں اور ایک چھکے سے مزین ناٹ آؤٹ 88 رنز کی طوفانی اننگز کی بدولت آسٹریلیا نے انگلینڈ کو یہاں57 رنز سے شکست دے کر سہ رخی ٹوئنٹی 20 سیریز کا خطاب جیت لیا۔آسٹریلیا نے 20 اوور میں چار وکٹ پر 209 رن بنائے جبکہ انگلینڈ کی ٹیم نو وکٹ پر 152 رن ہی بنا سکی۔آسٹریلیائی کپتان کو پلیئر آف دی میچ اور آسٹریلیا کی ہی میگن شٹ کو پلیئر آف دی سیریز کا خطاب ملا۔اس ٹورنمنٹ کی تیسری ٹیم میزبان ہندستان تھی جو اپنے چار لیگ میچوں میں صرف ایک میچ ہی جیت سکی۔آسٹریلیا2015 کے بعد سے یہ پہلی ٹوئنٹی 20 سریز فتح ہے اور اس جیت نے آسٹریلیائی خیمے کو مسکرانے کا موقع دیا ہے ۔آسٹریلیائی کرکٹ شائقین اپنے تین کھلاڑیوں اسٹیون اسمتھ، ڈیوڈ وارنر اور کیمرون بینکرافٹ بال ٹیمپرنگ میں پھنسنے اور ان پر پابندی لگنے کی وجہ سے حیران ہیں۔خواتین کی یہ جیت ان کے ملک کی کرکٹ کے زخموں پر مرہم کا کام کرے گی۔انگلینڈ نے ٹاس جیت کر پہلے فیلڈنگ کرنے کا فیصلہ کیا۔آسٹریلیا کا آغاز خراب رہا اور بیتھ موني کھاتہ کھولے بغیر چوتھی ہی گیند پر آؤٹ ہو گئیں ۔اوپنر ایلسا ھیلي اور ایشلے گارڈنر نے دوسرے وکٹ کے لئے 61 رن کی ساجھے داری کی۔لیکن اس شراکت کے بعد دونوں ہی ایک رن کے وقفہ میں آؤٹ ہو گئیں۔گارڈنر نے 20 گیندوں پر 33 رنز میں تین چوکے اور تین چھکے لگائے جبکہ ھیلي نے 24 گیندوں پر 33 رنز میں پانچ چوکے اور ایک چھکا لگایا۔آسٹریلیا نے آٹھویں اوور تک اپنے تین وکٹ 66 رن تک گنوا دیے ۔لیکن کپتان لئنگ نے ایلس ولاني کے ساتھ چوتھی وکٹ کے لئے139 رنز کی بڑی شراکت کر آسٹریلیا کو209 رنز کے مضبوط اسکور تک پہنچا دیا۔لئنگ نے انگلش بولروں کی کافی درگت بناتے ہوئے 16 چوکے اور ایک چھکا لگایا۔ لئنگ کی ٹوئنٹی 20 میچوں میں یہ12 ویں نصف سنچری تھی ۔ ولاني نے بھی دوسرے سرے پر بہترین بیٹنگ کی اور30 گیندوں پر51 رنز میں آٹھ چوکے لگائے ۔ولاني کی یہ11 ویں نصف سنچری تھی ۔انگلینڈ کے لئے آسٹریلیا کا 209 کا اسکور کافی بھاری ثابت ہوا۔انگلش ٹیم بروني اسمتھ اور تیمی بیومونٹ کو 14 رن پر گنوانے کے جھٹکے سے سنبھل نہیں پائی۔ڈینیل وائٹ نے 34، نیٹلی شیور نے 50 اور ایمی جونز نے 30 رن بنائے لیکن انگلینڈ کی ٹیم 152 رنز تک ہی پہنچ سکی۔