لندن۔23 مئی (سیاست ڈاٹ کام) پاکستانی ٹیم کے سابق بیٹسمین یونس خان نے کہا ہے کہ انگلینڈ کے خلاف ٹسٹ سیریز میں اظہرعلی، سرفراز احمد اور اسد شفیق کا کردار اہم ہو گا اور پاکستان کے لئے انگلینڈ کو اس کے ہوم گراؤنڈ پر ٹسٹ سیریز میں شکست دینا آسان نہیں ہو گا۔پاکستان اور انگلینڈ کے درمیان 2 ٹسٹ میچوں کی سیریز کا پہلا میچ جمعرات کو لارڈز میں کھیلا جائے گا اور ٹیم کے سابق اہم کھلاڑی یونس خان نے سیریز میں ٹیم سے اچھی کارکردگی کی امید ظاہر کی ہے۔ایک انٹرویو کے دوران یونس خان نے کہا کہ انگلینڈ کی ٹیم اپنی سرزمین پر ہمیشہ خطرناک حریف ثابت ہوئی ہے اور گرین شرٹس کے لئے اسے ٹسٹ سیریز میں ہرانا آسان نہیں ہو گا۔انہوں نے کہا کہ سیریز میں فتح کے لئے ٹیم کے ہر کھلاڑی کو اپنی ذمہ دار احسن طریقے سے نبھانا ہو گا اور ٹیم کے تجربہ کار بیٹسمینوں اظہر علی اور اسد شفیق کے ہمراہ کپتان سرفراز احمد کا کردار بھی اہم ہو گا۔پاکستان کی طرف سے ٹسٹ کرکٹ میں زیادہ سنچریوں اور زیادہ رنز کا اعزاز رکھنے والے یونس نے کہا کہ سرفراز احمد بہترین قائد ہیں اور مشکل وقت میں دباؤ کو جھیلنے کی صلاحیت رکھتے ہیں جبکہ کپتان کے ساتھ اظہرعلی اور اسدشفیق کا سیریز میں کردار اہم ہو گا۔مہمان ٹیم کی بیٹنگ کے حوالے سے سابق کپتان نے کہا کہ میرے خیال میں اظہرعلی اچھی فارم میں ہیں جبکہ اسد کو بھی چاہیے کہ وہ بڑی اننگز کھیلنے کی کوشش کریں۔ نوجوان بابر اعظم کو مستقبل کا اسٹار قرار دیتے ہوئے کہا کہ بابر بھی ابھرتے ہوئے اسٹار ہیں اور وہ ناصرف ٹی ٹونٹی اور ون ڈے بلکہ ٹسٹ کرکٹ میں بھی عمدہ مظاہرہ کرنے کی صلاحیت رکھتے ہیں۔یاد رہے کہ بابر اعظم کو دورہ انگلینڈ کے لیے منتخب کرنے پر سلیکشن کمیٹی کو کافی تنقید کا نشانہ بنایا گیا تھا کیونکہ اب تک ٹسٹ کرکٹ میں وہ کچھ قابل ذکر کارکردگی دکھانے میں ناکام رہے لیکن آئرلینڈ کے خلاف میچ میں انہوں نے دوسری اننگز میں مشکل وقت میں 59رنز کی اننگز کھیل کر اپنی صلاحیتوں کا لوہا منوایا ہے۔یونس نے بھی بابر اعظم کو ٹسٹ کرکٹ کے لیے موزوں قرار دیتے ہوئے کہا کہا مجھے پوری امید ہے کہ وہ انگلینڈ کی وکٹوں پر اچھی کارکردگی دکھا کر ٹیم کو فتوحات دلانے میں کردار ادا کریں گے۔سابق کپتان نے دورہ انگلینڈ کے لیے ٹیم کی تیاریوں پر اطمینان کا اظہار کرتے ہوئے کہا کہ بعض لوگوں کو ٹیم کی کارکردگی پر تشویش ہے لیکن میرے خیال میں ہماری ٹیم سیریز کے لیے پوری طرح سے تیار ہے، اس لیے مجھے دونوں ٹیموں کے درمیان ٹسٹ سیریز میں دلچسپ مقابلے کی توقع ہے۔
