انگلش ٹیم کا گھریلو سیزن کیلئے آج انتخاب

لندن۔15 مئی(سیاست ڈاٹ کام) انگلش ٹیم کو پاکستان کیخلاف 2 ٹسٹ کھیلنا ہے اورپہلا میچ24 مئی کو لارڈز میں شروع ہوگا جس کیلیے ٹیم کا اعلان کل کیا جائے گا لیکن اس سے قبل ہی میزبان ٹیم کیلیے ایک بْری خبر ہے کہ مارچ میں نیوزی لینڈ کیخلاف کریر کے آغاز پر عمدہ کارکردگی کرنے والے جیک لیچ زخمی ہونے کی وجہ سے دستیاب نہیں ہوں گے، سمرسٹ کے اسپنر وارم اپ میچ میں بائیں ہاتھ کا انگوٹھا تڑوا بیٹھے تھے۔ یہ اطلاع سامنے آئی کہ وہ پاکستان کیخلاف میچز نہیں کھیل پائیں گے،یہ بھی طے نہیںکہ کب تک دوبارہ ایکشن میں آنے کیلیے تیار ہوں گے، اس صورتحال میں نئے سلیکٹر کی اسپن شعبہ کو تقویت دینے کیلیے فکرمندی بڑھ گئی ہے،معین علی کو موقع دیا جاسکتا ہے لیکن ان کی حالیہ فارم اچھی نہیں۔آئی پی ایل میں رائل چیلنجرز بنگلور نے انھیں باہر بٹھائے رکھا،وہ صرف 2 میچز کھیل سکے،ایک وکٹ حاصل کی اور 11رنز بنائے،جیک لیچ کی کائونٹی سے ہی تعلق رکھنے والے ڈومنیک بیس اور سمیت پٹیل میں سے بھی کسی کو طلب کیا جاسکتا ہے۔فرسٹ کلاس کرکٹ میں نمایاں کارکردگی دکھانے والے امار ویردی کو بھی حیران کن طور پر آزمانے کا امکان رد نہیں کیا جا سکتا۔یاد رہے کہ سال میں کھیلے گئے3ٹسٹ میچز میں دوسرا موقع ہے کہ کسی اسپنر نے کریر کا آغازکیا ہے اور زخمی ہونے کی وجہ سے باہر ہوگیا قبل ازیں میسن کرین جنوری میں سڈنی ٹسٹ کے بعد ایکشن میں نہیں آسکے۔