لاہور۔19 اپریل(سیاست ڈاٹ کام)دورہ آئرلینڈ و انگلینڈ کے دوران پاکستانی کرکٹ ٹیم کے ہیڈ کوچ مکی آرتھر نوجوان کھلاڑیوں پر مشتمل پاکستانی ٹیم کے ساتھ نئے تجربات کا ارادہ رکھتے ہیں اور ان تجربات کی کامیابی ٹیم کیلئے بہت اہم ثابت ہوگی۔دائیں ہاتھ سے بیٹنگ کرنے والے بابر اعظم پاکستان کی جانب سے ونڈے میں تیسرے نمبر پر اور ٹی ٹوئنٹی میں اوپننگ کرتے ہیں لیکن آئرلینڈ اور انگلینڈ میں ٹسٹ میچوں کے دوران انہیں چوتھے یا پانچویں نمبر پر کھلانے کی تجویز ہے۔سب سے اہم اور مشکل ترین مقام 3 نمبر پر حارث سہیل کھیلیں گے۔ حارث سہیل چھٹے نمبر سے تیسرے مقام پر آئیں گے۔ حیران کن طور پر جارحانہ اوپنر فخر زمان کو بھی مڈل آرڈر میں پانچویں یا چھٹے نمبر پر آزمایا جائے گا اور انہیں ذمہ داری دی جائے گی کہ وہ جارحانہ بیٹنگ کریں۔ ٹیم انتظامیہ نے تربیتی کیمپ کے دوران جو حکمت عملی بنائی ہے اس کے مطابق اس دورے میں بیٹنگ کے مختلف صف بندیاں آزمائی جائیں گی۔ذرائع کے بموجب اظہر علی یقینی طور پر اننگز کا آغاز کریں گے۔ اوپننگ کا دوسرا مقام پر سمیع اسلم اور امام الحق کے درمیان مقابلہ ہے۔ چوتھے نمبرپر بیٹنگ کیلئے بابر اعظم اور پانچویں پر تجربہ کار اسد شفیق آئیں گے۔سیریز میں سب سے دلچسپ فیصلہ فخر زمان کو چھٹے نمبر پر کھلانے کا ہے۔ ٹسٹ میچوں میں عام طور پر چھٹے نمبر والا بیٹسمین جس وقت کریز پر آتا ہے مخالف ٹیم کو دوسری نئی گیند مل جاتی ہے، اس لئے فخر زمان کو اس نئے چیلنج کا سامنا بھی ہوگا۔ دو ٹور میچوں کے بعد پاکستانی ٹسٹ ٹیم کے حتمی 11 کھلاڑی سامنے آئیںگے۔پاکستان اور آئرلینڈ کے درمیان واحد ٹسٹ میچ 11 سے 15 مئی تک ڈبلن میں کھیلا جائے گا جبکہ انگلینڈ کے خلاف 2 ٹسٹ میچز پر مشتمل سیریز کا آغاز 24 مئی کو ہوگا، دوسرے ٹسٹ یکم جون کو ہو گا۔
