نئی دہلی ۔19 جون (سیاست ڈاٹ کام)بالی ووڈ اداکارہ انوشکا شرما اور ان کے کرکٹر شوہر ویراٹ کوہلی ہمیشہ ہی سوشل میڈیا پر متحرک نظر آتے ہیں لیکن کوہلی کی حالیہ ویڈیو نے نئی بحث کا آغاز کردیا۔حال ہی میں انوشکا شرما کے شوہر کوہلی نے ٹوئٹر پر اپنی بیوی کی ایک ویڈیو شائع کی، جس میں وہ ایک لگژری کار میں سوار نوجوان کو ڈانٹ رہی ہیں۔ویڈیو میں دیکھا جاسکتا ہے کہ انوشکا شرما اپنی کار میں بیٹھی ہیں اور ایک نوجوان کو سڑک پر کچرا پھینکنے پر وہ راہ چلتے ہوئے ڈانٹ رہی ہیں۔وہ اپنی کار کے شیشے کو نیچے کرکے لگژری کار میں سوار لڑکے کو کہتی ہیں کہ ’آپ نے سڑک پر کچرا کیوں پھینکا، آپ اس طرح سڑک پر کچرا نہیں پھینک سکتے، آئندہ احتیاط کیجئے گا‘۔مختصر ویڈیو کو کوہلی نے اپنے ٹوئٹر پر شائع کرتے ہوئے اپنی اہلیہ کی تعریف کی۔کوہلی نے ساتھ ہی سوالیہ انداز میں لکھا کہ ’لگژری کار میں سفر کرنے والے افراد جن کے ذہن میں کچرا بھرا ہوا ہے، کیا ایسے لوگ ہمارے ملک کو صاف کریں گے؟۔ساتھ ہی کوہلی نے عوام کو تجویز دی کہ اگر وہ کسی کو سڑک پر کچرا پھینکتے دیکھیں تو انہیں انوشکا شرما کی طرح سمجھائیں۔بعد ازاں ارہان سنگھ نامی شخص نے فیس بک پر اپنی پوسٹ میں انوشکا شرما اور ویراٹ کوہلی کو آڑے ہاتھوں لیتے ہوئے ان کے اس طرز عمل کو سستی شہرت کا طریقہ قرار دیا۔ارہان سنگھ نے اپنی پوسٹ میں لکھا کہ ‘ان کی جانب سے پیغام پر مبنی ویڈیو پوسٹ کرنا، شہرت حاصل کرنا نہیں ہے۔انہوں نے واضح کیا کہ ان کی کار سے غلطی سے پلاسٹک کی بوتل گری تھی۔ساتھ ہی انہوں نے لکھا کہ ‘ان کی کار سے غلطی سے گرنے والا کچرا انوشکا شرما کی زبان سے نکلنے والے کچرے سے کم تھا۔نوجوان نے دعویٰ کیا کہ ‘انہوں نے اداکارہ سے اپنی غلطی پر معافی بھی مانگی تھی تاہم دونوں نے سستی شہرت کے لئے ریکارڈنگ کی اور ویڈیو شائع کی۔وزیرداخلہ کرن رجو نے ٹوئیٹ کیا کہ ہندوستان کو انوشکا شرما اور کوہلی جیسے لوگوں کی ضرورت ہے۔ سماجی اخلاق، سماجی احساس اور اخلاقی رویہ دولت اور تعلیم سے نہیں آتی۔ساتھ ہی انہوں نے اپنی ٹوئیٹ میں حکومتی مہم ہیش ٹیگ بھی استعمال کرتے ہوئے لوگوں کو اس مہم میں حصہ لینے کی دعوت دی۔ ایک اور وزیر روی شنکر پرساد نے بھی انوشکا شرما اور کوہلی کے اس عمل کی تعریف کی۔ کوہلی کی ویڈیوکے بعد دیگر افراد نے بھی اس پر ٹوئیٹس کیں۔بھاویا ڈھنگڑا نے اداکارہ کو اپنے علاقے کی خستہ حالت کے بارے میں بتایا اور کہا کہ وہ ان کے حق میں بات کیوں نہیں کرتیں؟سنجوکتا باسو نامی صارف نے ویڈیو کو سستی شہرت حاصل کرنے کا عمل قرار دیااور کہا کہ آخر کوہلی کو مودی حکومت کی اس مہم کا حصہ بننے کی ضرورت کیوں پیش آئی؟
