لاہور۔13 ستمبر (سیاست ڈاٹ کام ) پاکستان کرکٹ بورڈ (پی سی بی) کے چیف سلیکٹر انضام الحق پر الزام عائد کیا گیا ہے کہ انہوں نے اپنے بیٹے کو جونئیر ٹیم منتخب کروانے کے لیے اپنا اثر و رسوخ استعمال کیا، تاہم ان کی جانب سے اس الزام کی تردید کردی گئی۔پاکستان کرکٹ میں اپنے بیٹوں یا رشتہ داروں کو ٹیم میں منتخب کروانے کے لیے سابق ٹسٹ کرکٹرز کی جانب سے اپنا اثرورسوخ استعمال کرنے کے تنازعات سامنے آتے رہتے ہیں۔تاہم اس مرتبہ ایک سابق کپتان کی جانب سے اپنا اثرورسوخ استعمال کرکے بیٹے کو ٹیم میں شامل کروانے کا معاملہ سامنے آیا ہے جس میں چیف سلیکٹر سینئر ٹیم انضام الحق اور چیف سلیکٹر جوئیر ٹیم باسط علی مبینہ طور پر ملوث ہیں۔سابق چیف سلیکٹر عبدالقادر نے تنازعہ کو اٹھاتے ہوئے الزام عائد کیا ہے کہ مجھے باسط علی نے بتایا کہ انہیں انضمام الحق نے اپنے بیٹے ابتسام الحق کو جونیئر ٹیم میں شامل کرنے کی درخواست کی تھی۔تاہم انضام الحق اور باسط علی کی جانب سے عبدالقادر کے الزامات کی تردید کی گئی جبکہ انضام الحق کے درینہ دوست محمد یوسف نے بھی ان کی حمایت میں بات کی۔اپنے ایک ویڈیو پیغام میں انضمام الحق نے چیئرمین پی سی بی احسانی مانی سے مطالبہ کیا کہ وہ اس معاملے کی تحقیقات کروائیں اور اگر وہ اس میں قصوروار ہوتے ہیں تو انہیں سزا دی جائے۔سماجی رابطے کی ویب سائٹ پر اپنے ایک پیغام میں انضمام الحق نے کہا کہ وہ ان بے بنیاد الزامات کو مسترد کرتے ہیں۔میں یہ ریکارڈ کے لیے بتادوں کہ میں نے جونئیر سلیکشن کمیٹی کے کسی بھی رکن سے رابطہ نہیں کیا۔ وہ اس معاملے کو سنجیدگی سے لے رہے ہیں، اور اس معاملے کو چیئرمین پی سی بی کے سامنے بھی اٹھائیں گے اور درخواست کریں گے کہ اس معاملے میں تحقیقات ہونی چاہئیں۔چیف سلیکٹر جونیئر ٹیم باسط علی نے بھی ملے جلے ردِ عمل کا اظہار کرتے ہوئے کہا کہ وہ چیئرمین پی سی بی سے درخواست کریں گے کہ جھوٹی خبریں پھیلانے والوں کی سزا کو یقینی بنانے کے لیے اس معاملے کی تحقیقات کی جائے۔ریکارڈ ساز ٹسٹ بیٹسمین محمد یوسف نے بھی الزامات کی تحقیقات کروانے کا مطالبہ کرتے ہوئے کہا کہ یہ تحقیقات ثابت کردے گی کہ انضمام الحق درست بول رہے تھے۔خیال رہے کہ انضمام الحق کو اپنے بھتیجے امام الحق کے ٹیم میں انتخاب پر تنقید کا سامنا تھا، تاہم امام الحق نے میدان میں کارکردگی دکھا کر خودپر ہونے والی تنقید کو غلط ثابت کیا۔
